Kryeministri kroat, Andrej Plenkoviç, ka shkarkuar dje Darko Horvat nga posti i Ministrit të Planifikimit Hapësinor, Ndërtimit dhe Pronës Shtetërore, me kërkesën e tij personale.
Lajmin për gazetën “Jutarnji list” e ka konfirmuar zëdhënësi i Qeverisë kroate.
Avokati Vladimir Tereshak, i cili përfaqëson të arrestuarin Horvat, kishte deklaruar më parë se klienti i tij ishte deklaruar i pafajshëm për shpërdorim detyre gjatë marrjes në pyetje dhe se prokuroria kërkon ndalimin e tij.
Ai u tha gazetarëve në Zagreb se Horvat ishte mbrojtur në mënyrë aktive para hetuesve nga Zyra për Luftën kundër Korrupsionit dhe Krimit të Organizuar (USKOK) për më shumë se një orë dhe USKOK kishte kërkuar që paraburgimi të vendosej sonte nga një gjykatës hetues nga Gjykata e Qarkut të Zagrebit. .
Avokati tha se Horvati akuzohej për shpërdorim të pozitës dhe kompetencave, përkatësisht se kompanive të caktuara që aplikuan në konkurs pa dokumentacion tenderi u është dhënë e drejta e përparësisë, gjë që ministri e mohon. Ai tha se për çdo gjë janë në krye të gjitha shërbimet profesionale të ministrisë.
Rasti, siç tha ai, ka të bëjë me disa persona, dhe rrjedh nga një rast tjetër ku një nga të dyshuarit është ish-asistentja e tij Ana Mandac. Ajo dha dorëheqjen pasi dyshohej për përvetësim me ish-sekretaren e Shtetit Josipa Rimac.
