“Sfida për prokurorët dhe gjyqtarët në betejën për të garantuar sundimin e ligjit dhe akses të barabartë në drejtësi është e përditshme. Në atë betejë ata shpesh kritikohen dhe sulmohen”, tha prokurori publik i Republikës së Maqedonisë së Veriut Ljubomir Joveski në fjalimin e mbrëmshëm në manifestimin solemn me rastin e 15 vjetorit të Akademisë për gjyqtarë dhe prokurorë publikë, përcjell Telegrafi Maqedoni.
Megjithatë, shtoi ai, kjo duhet të jetë vetëm një nxitje më e madhe për prokurorët publikë dhe gjyqtarët që të kryejnë detyrat e tyre në mënyrë profesionale, të paanshme dhe të përgjegjshme.
Joveski theksoi rolin jetik që ka gjyqësori në krijimin e themeleve mbi të cilat mbështetet çdo demokraci.
“Ne prokurorët dhe gjyqtarët në punën dhe vendimet që marrim duhet të sigurojmë barazinë e qytetarëve para ligjit. Derisa të arrihet kjo, qytetarët nuk do të kenë besim në punën tonë. Ai minon sigurinë juridike në shoqëri dhe është një terren pjellor për korrupsion që nuk njeh kufij dhe sulmon si vendet e zhvilluara ashtu edhe ato të pazhvilluara”, tha Joveski.
“Asnjë vend, sado demokratik qoftë, nuk është imun ndaj korrupsionit. Por kjo nuk duhet të jetë alibi apo justifikim që ne të tolerojmë këtë sëmundje sociale që po shkatërron ekonominë, po shkatërron demokracinë dhe po na largon nga e ardhmja e dëshiruar në Bashkimin Evropian”.
Ai theksoi se nuk duhet kërkuar arsyetime për kritikat për joefikasitetin e ndjekjes penale, parashkrimin e ndjekjes penale dhe joefikasitetin e seancave. “Kohëzgjatja e gjatë e procedurës nuk jep drejtësi dhe me të drejtë thuhet se drejtësia e ngadaltë shpeshherë është edhe padrejtësi. Qytetarët me të drejtë kërkojnë drejtësi të shpejtë dhe efikase. Nuk duhet lejuar që pas më shumë se 100 seancave në një rast konkret në të cilin ka viktima njerëzore, të mos merret vendim”, tha Joveski, duke shtuar se “ata gjyqtarë dhe prokurorë që udhëhiqen nga interesa të tjera, e jo nga ato profesionale nuk kanë vend në radhët tona”./Telegrafi/
