Situata vazhdon të jetë e tensionuar mes dy vendeve, Greqisë dhe Turqisë, presidenti turk Rexhep Tajip Erdogan ditën e sotme ka bërë sërish deklarata provokuese në lidhje me Greqinë dhe Francën.
Në veçanti, Erdogan ka bërë kërcënime ndaj Presidentit francez, Emmanuel Macron duke thënë se ky i fundit do të ketë shumë probleme me të. Ai shton që ata nuk kanë një histori dhe as që e njohin vendin e tyre, prandaj duhen të tërhiqen.
Erdogan u shpreh se, “Macron është shumë i zënë me mua. Macron, ju do të keni shumë probleme me mua, personalisht. Unë tashmë ju kam thënë, shumë herë, por ju nuk dëgjoni. Ju nuk keni një histori dhe as nuk e njihni vendin tuaj”.
Ndërsa për sa i përket Greqisë, presidenti turk tha se po merr rrugën e gabuar.
Por nuk është i vetmi Erdogan i cili flet ashpër ndaj Macron pasi edhe më parë Ministri turk i Energjisë Fatih Domnez shënjestroi presidentin francez për deklaratat e tij në takimin në Korsikë.
Në të njëjtën kohë, ai bëri deklarata provokuese në lidhje me kërkimet e pretenduara të Oruc Reis në Mesdheun Lindor, duke thënë “se shumë shpejt do të ketë lajme të mira për kërkime si në Mesdheun Lindor ashtu edhe në Detin e Zi”. /CNN
