Nxënësit dhe qytetarët duhet të paraqiten në Inspektoratin Shtetëror të Arsimit (ISHA) nëse shkollat u kërkojnë atyre që të paguajnë për dëftesat për fundin e vitit shkollor, tha ministri Arbër Ademi, duke iu përgjigjur pyetjes së një gazetari në lidhje me raste të tilla për të cilat gjithashtu ka ankesë deri te Avokati i Popullit.- Advertisement –
“Unë e dënoj çdo veprim të tillë që i detyron nxënësit të paguajnë për diçka për të cilën ata nuk kanë asnjë detyrim. Ne i sigurojmë dëftesat pa pagesë dhe i inkurajoj të gjithë qytetarët dhe nxënësit t’i raportojnë në ISHA, ndërsa Inspektorati t’i sanksionojë ato për shkelje të ligjeve”, tha Ademi.
Lidhur me procedurën e zgjedhjes së rektorit të Universitetit të Shkupit, ai tha se nuk i di të gjitha detajet e procesit dhe se ai ishte i brendshëm për secilin universitet, ndërsa se MASH i krijon politikat arsimore.
“Universitetet kanë autonomi të plotë dhe e kryejnë procedurën në mënyrë autonome. Unë pres që gjithçka të shkon ashtu siç duhet dhe për këtë arsye jemi të interesuar si një institucion kompetent për arsimin. Ligji i ri për arsimin e lartë e demokratizon tërë procesin e zgjedhjes së organeve dhe mandateve”, tha ministri.
Lidhur me reagimin e kandidatit për rektor prof. Dr. Petar Atanasov, i cili u eliminua nga konkursi, Ademi u përgjigj se MASH nuk është përgjegjëse për aktivitetet operative dhe se ankesat i paraqiten ISHA-së për çdo çështje që lidhet me arsimin.
Në lidhje me reagimin e institucioneve private të arsimit të lartë për diskriminimin e studentëve të tyre për të cilët nuk vlejnë vauçerët që i jep Qeveria, Ademi u përgjigj se është dakord që të gjithë studentët duhet të kenë të njëjtat kushte, por se kështu janë mundësitë. Dekretet janë të Qeverisë, tha Ademi, ndërsa edhe më parë ka pasur raste kur disa masa ishin të vlefshme për një kategori studentësh, ndërsa për të tjerët jo.
“Për fat të keq, masa është ashtu siç është. Unë do të dëshiroja t’i përfshija të gjithë studentët në vend, pavarësisht se në cilin institucion të arsimit të lartë ata studiojnë – publik ose privat apo publik-privat, siç është, për shembull, Universiteti i Evropës Juglindore, i cili me të drejtë e ngriti këtë çështje. Por duhet t’i kemi parasysh edhe mundësitë financiare në mënyrë që të sigurojmë fonde për të gjithë studentët, pavarësisht se ku studiojnë”, tha ministri.
Ademi gjithashtu tha se gjatë verës do të përgatiten për vitin e ri shkollor 2020/2021 dhe për çdo skenar, megjithëse ai pret që nga 1 shtatori orët e mësimit të jenë në kushte normale dhe nxënësit të kthehen në bankat e shkollës. Do të ketë trajnim të mësuesve dhe infrastruktura do të përmirësohet për mësimdhënie më të suksesshme onlajn nëse kushtet e kërkojnë atë.
Është formuar gjithashtu një grup i gjerë pune me përfaqësues ndërkombëtarë dhe, siç tha ai, ka propozime të ndryshme në tavolinë, ndërsa cili prej tyre do të aktivizohet do të varet nga rrethanat./MIA-tv21
