Kryeministri në detyrë Albin Kurti ka thënë se Avdullah Hoti në pozitën e zëvendëskryeministrit, ka qenë destruktiv gjatë kohës së qeverisjes.
Ai thotë se Hoti nuk është as ndër 10 personat më të votuar në zgjedhjet e 6 tetorit.
Për kandidimin e tij nga LDK-ja për pozitën e kryeministrit, ai ka thënë se presidenti Thaçi kërkon një kryeministër të dobët.
“Hoti ka qenë destruktiv thua se kishte një kovë me rërë që rrotave të Qeverisë më të mirë të pasluftës t’ua hedh dhe ta ngadalësojë ecjen tonë. As ndër 10 njerëzit më të votuar nuk është. Nuk bëhet fjalë për demokraci dhe legjitimitet, bëhet fjalë për dëshirën e presidentit ta ketë një kryeministër të dobët. Meqenëse presidenti dëshiron të jetë më shumë se president atij i nevojitet një kryeministër që është më pak se kryeministër. Ai do që kryeministri t’ia mbajë ison në intencën në gjendjen e jashtëzakonshme. Me mua nuk e bënë këtë. Shkoi në Washington u kthye pa marrëveshje, erdhi në këshillin e sigurimit dhe doli pa vendim”, thuhet në njoftim.
Ndërkaq vendimin e Thaçit për t’ia dhënë mandatarin LDK-së, e ka quajtur arbitrarë.
Ai tutje ka thënë se nuk do të diskutojë ende për një Qeveri, e cila sipas tij nuk dihet ende nëse do të ndodhë.
”Unë nuk e kam tekstin me nënshkrim të ofertës së presidentit për partinë e dytë. E kam parë në media si përfalje por jo edhe letrën. Duhet ta shohim letrën dhe të analizojmë se në çfarë baze kushtetuese. Se bëhet fjalë për shkelje s’ka dyshim. Letra e parë e presidentit ishte më 2 prill, në pasditen e 22 prillit ai konstatoi se po e refuzojmë, ku e mori ai që duhet të pritet 20 ditë. Është totalisht arbitrare. Thaçi duhet ta respektojë kushtetutën, nëse ka zbrastira në kushtetutë nuk e shkruan presidenti”, ka thënë ai.
Sipas tij, ka shumë punë që të mbërrihet deri te një qeveri e re.
Kurti: Nuk mund t’i ndalë protestat e thirrura nga qytetarët, ato s’janë monopol i VV-së
Ndërkaq i pyetur për thirrjet në rrjetet sociale për protesta, Kurti ka thënë se nuk mund t’i ndalojë qytetarët të shprehen.
Ai thotë se si Lëvizje Vetëvendosje nuk kanë organizuar ndonjë protestë.
“Unë nuk mund t’i ndalojë dhe nuk do ti ndalojë qytetarët që të shprehen. Tash jemi në një situatë pandemie dhe duhet të respektohen vendimet e MSH-së dhe këshillat e mjekëve dhe ekspertëve. Urojmë që sikurse e thirrën këshilltarin Gashin të mos kenë prokurorë e policë që i thërrasin në biseda informative
Sipas tij, ai nuk mund t’i ndalë qytetarët të protestojnë, duke shtuar se protesta nuk është monopol i VV-së.
“Nuk është viti 1990 kur ndalohen protestat por është viti 2020. Unë nuk jam këtu t’i ndalojë protestat po t’iu shërbejë sipas programit. Rrjetet sociale nuk është se kam kohë t’i përcjellë dhe nuk i di thirrjet por VV nuk e ka organizuar atë protestë. Por protesta nuk është monopol i VV-së. Sa të ketë qytetari e popull do të ketë protesta”, ka thënë ai.
Për pagesat në veri, ai ka thënë se “ne do të përpiqemi me KOSST-in dhe Ministrinë e Ekonomisë që të fillojë faturimi në veri”, ka thënë ai.
Derisa për pakon emergjente, ai ka thënë se do t’i rishikojnë kushtet për vazhdimin e masave edhe më tutje.
