Ka sasi të mjaftueshme të testeve, afër 1.500 në këtë moment, ndërsa ka paralajmërime edhe për donacion të një mijë testeve dhe furnizim tonin edhe me një mijë që duhet të përfundojë gjatë kësaj jave, deklaroi ministri i Shëndetësisë, Venko Filipçe në konferencën e sotme për media.
“Kemi informacion se vendi ynë mund të llogarisë në sasinë prej një mijë testeve në javë për shkak se kërkesa për momentin në të gjitha vendet është e madhe”, tha Filipçe.
Sa i përket asaj se një institucion shëndetësor në vend ankohet për mungesë të maskave mbrojtëse dhe dorezave, Filipçe tha se deri te ai nuk ka arritur informacion i tillë.
“Rregullisht komunikojmë me të gjitha institucionet publike shëndetësore dhe ato në kuadër të organizimit të tyre kanë bërë riorganizim”, tha Filipçe, duke shtuar se mund ta kontrollojnë cilindo institucion shëndetësor publik.
Shtoi se spitali në Dibër me siguri është i pajisur, ndërsa atje sot pasdite do të dërgohet edhe një pulmolog nga Klinika e Pulmologjisë. Sa i përket asaj se a do të dërgohen respiratorë në Dibër, Filipçe tha se vlerësimi është se në këtë moment nuk ka nevojë spitali në këtë qytet të pajiset me repart për kujdes intensiv sepse atje nuk ka ekspertizë adekuate.
“Që të ekzistojë repart për kujdes intensiv me respiratorë, duhet të ketë edhe kuadër kështu që vlerësimi është se nuk ka nevojë spitali në Dibër të pajiset me një repart të tillë sepse nuk ka ekspertizë adekuate, ndërsa ka mundësi që për këtë të jetë i gatshëm Shërbimi për Ndihmë Urgjente i cili mund të japë mbështetje respirator deri te Klinika Infektive në Shkup”, tha Filipçe.
Edhe një herë theksoi se një pjesë shumë e madhe e suksesit në këtë luftë kundër virusit është edhe në duart e qytetarëve të cilët kanë rol kyç.
