Nuk kanë qenë të paktë ata të cilët gjatë kësaj periudhe iu janë drejtuar farmacive për të blerë Vitaminë C.
Por siç bën me dije edhe dietologia Enkeleida Ferrollari është e udhës që marrja e saj të bëhet nëpërmjet ushqimeve të cilat janë të pasura me Vitamin C si portokalli, limoni, mandarina apo kivi.
Sipas dietologes, sasia e vitaminës C, që përmbajnë agrumet mund të jetë e mjaftueshme për nevojat ditore. Sa u takon atyre që iu janë drejtuar farmacive, Ferrollari ka këtë përgjigje.
“Mënyra më e mirë për të marrë vitaminën C është nëpërmjet ushqimit. Në rastet e kequshqyerjes mund të merret në formën e suplementeve, por me rekomandimin e mjekut. Marrja me tepri e vitaminës C shkakton shfaqjen e radikaleve të lira të cilat janë shumë të dëmshme për indet dhe qelizat, si dhe mund të shkaktojë gur në veshka për shkak se vitamina C eleminohet nëpërmjet veshkave në formën e oksalateve”.
Kryefjala e këtyre ditëve padiskutim është koronavirusi dhe shqetësimi më i madh që të gjithë kem sot kur gjendemi “të ngujuar” në shtëpi është si mund të mbrohemi nga ky virus.
Sa e rëndësishme është mënyra sesi ushqehemi dhe cilat janë sugjerimet tuaja për të rritur imunitetin?
Një sistem i fortë imunitar bën që të përballojmë më mirë virozat. Ushqimi është një element shumë i rëndësishëm për forcimin e sistemit imunitar. Një ushqim i shëndetshëm dhe i pasur me elementë makro dhe mikro ushqyes bën të mundur që të kemi një sistem imunitar të fortë. Duhet të ndjekim një dietë të ekulibruar duke marrë sasinë e nevojshme të karbohidrateve 55% – 60% të kalorive ditore. Karbohidratet duhet të jenë në formën e drithërave, makarona, orizi, buka e zezë, patate, etj.
Proteinat janë elementë shumë të rëndësishëm për imunitetin. Burim i proteinave mund të jenë mishi i kuq pa dhjamë (1 herë në javë), mishi i pulës (1-2 herë në javë), peshku (2 herë në javë), bulmetrat si qumështi, kosi, djathi, 3 racione në ditë)
Ndërsa, yndyrnat duhet të jenë të kontrolluara.
Çfarë rekomandohet që të shmanget?
Yndyrnat shtazore ndikojnë në lidhjen dhe dobësimin e sistemit imunitar. Duhet të eleminojmë mishin me dhjam, sallamrat, proshutrat me dhjamë si dhe të gjitha ushqimet e përpunuara. Frutat dhe zarzavatet e stinës duhet t’i kemi pjesë së menusë së çdo vakti 5 racione në ditë. Frutat dhe zarzavatet janë burim i vitaminave, kripërave minerale, elementëve antioksidantë dhe fibrave. Fokusi është vënë edhe tek vitamina C. Madje nuk kanë qenë të paktë ata të cilët u janë drejtuar farmacive.
A është e mjaftushme marrja e saj nëpërmjet ushqimeve apo nevojiten suplemente të tjera shtesë?
Vitamin C është një antioksidant shumë i mirë dhe një elementë i rëndësishëm për forcimin e sistemit imunitar. Vitaminën C e gjejmë tek të gjitha zarzavatet si dhe tek agrumet.
Nëse ndjekim një dietë të ekulibruar të pasur me fruta dhe zarzavatet është e pamundur të kemi mungesa të vitaminës C në organizëm. Agrumet kanë sasira të konsiderueshme të vitaminës C. Sasia e vitaminës C që përmban portokalli, limoni, mandarina, kivi, etj, mund të jetë e mjaftueshme për nevojat ditore të vitaminës C.
Mënyra më e mirë për të marrë vitaminën C është nëpërmjet ushqimit. Në rastet e kequshqyerjes mund të merret në formën e suplementeve, por me rekomandimin e mjekut. Marrja me tepri e vitaminës C shkakton shfaqjen e radikaleve të lira të cilat janë shumë të dëmshme për indet dhe qelizat, si dhe mund të shkaktojë gur në veshka për shkak se vitamina C eleminohet nëpërmjet veshkave në formën e oksalateve.
Së fundmi, po roli i vitaminës D në organizëm cili është, sepse kemi dëgjuar të thuhet që është po ashtu e rëndësishme?
Përveç vitaminës C, një element i rëndësishëm për forcimin e sistemit imunitar është vitamina D. Vitaminën D e gjejmë tek veza, salmon, sardelja, peshku ton, etj. Gjithashtu ekspozimi në diell është një mundësi shumë e mirë që ndihmon në sintetizimin e vitaminës D. Nëse e marrim në formën e suplementit duhet gjithnjë t’i marrim më rekomandimin e mjekut.
Gjithashtu në forcimit imunitar ruajnë një rol të madh edhe vitamin A dhe vitaminat e grupit B. Vitaminën dhe ato të grupit B kryesisht atë B12, i gjejmë ekskluzivisht tek produktet shtazore, si mishi, peshku, pula, bulmetrat, veza, etj.
.
