BallinaLajmeMickoski nga Berlini: Në botë po zhvillohet një luftë e tretë botërore...

Mickoski nga Berlini: Në botë po zhvillohet një luftë e tretë botërore e heshtur

Kryeministri i Maqedonisë së Veriut, Hristijan Mickoski, deklaroi të enjten nga Berlini se bota po kalon nëpër “një luftë të tretë botërore të heshtur”. Ai e tha këtë menjëherë pas takimit të Koalicionit të të Vullnetshmëve për Ukrainën, të organizuar nga kancelari gjerman Friedrich Merz.

Mickoski ishte në Kancelarinë gjermane bashkë me ministrin e Punëve të Jashtme dhe Tregtisë së Jashtme, Timço Mucunski. Në takim ishin dhjetëra delegacione, mes tyre presidenti francez Emmanuel Macron dhe presidenti ukrainas Volodymyr Zelensky.

“Në botë ka vërtet shumë sfida globale, por është mirë që Maqedonia është pjesë e tryezës”, tha Mickoski në një video në Facebook. Sipas tij, megjithë rrethanat ndërkombëtare, Qeveria po gjen mënyra për ta lehtësuar standardin jetësor të qytetarëve.

Trump kyçet me telefon nga aeroplani

Mickoski bëri të ditur se në takim ishin edhe negociatorët amerikanë për paqen në Ukrainë. Presidenti Donald Trump u kyç me telefon dhe i informoi liderët për bisedimet me presidentët e Rusisë dhe Kinës.

Sipas mediave ndërkombëtare, Trump e thirri dhëndrin e tij, Jared Kushner, nga Air Force One, gjatë kthimit nga Kina. Atje ai kishte mbajtur takimin e parë trepalësh me Vladimir Putinin dhe Xi Jinpingun. Kushner e vuri bisedën në zë të lartë që ta dëgjonin të gjithë pjesëmarrësit. Kushner dhe i dërguari special Steve Witkoff kishin ardhur në Berlin pa u paralajmëruar.

Mbështetje për paqe të drejtë

Në një postim tjetër, Mickoski shkroi se Maqedonia e Veriut e ka konfirmuar mbështetjen për “një paqe të drejtë dhe të qëndrueshme në Ukrainë, përmes dialogut, diplomacisë dhe koordinimit me aleatët tanë”. Sipas tij, në takim u theksua nevoja për më shumë përpjekje për ta përfunduar luftën dhe për veprim të përbashkët të partnerëve evropianë me Shtetet e Bashkuara.

Edhe kancelari Merz tha në konferencën për media se synimi është një paqe e drejtë dhe e qëndrueshme për Ukrainën.

Paralajmërim për dimër të vështirë

Nga Berlini, Mickoski paralajmëroi gjithashtu se Evropën dhe Maqedoninë i pret një dimër i vështirë. Vetëm pak ditë më parë, ai kishte thënë se gazi kushton tri herë më shumë se vjet. Ka pranuar se çmimi i ngrohjes qendrore në Shkup mund të rritet, por ka premtuar se rritja do të jetë e përballueshme.

Maqedonia e Veriut është anëtare e NATO-s që nga viti 2020 dhe merr pjesë rregullisht në takimet e aleatëve perëndimorë për mbështetjen e Ukrainës.

RELATED ARTICLES
- Advertisment -

Most Popular

Recent Comments