Dëshmitarë të shumtë, pjesëmarrës në protestat masive në Iran, kanë treguar për brutalitetin e ushtruar ndaj tyre nga regjimi. Sipas një raporti nga Sunday Times, nga një rrjet mjekësh në terren, të paktën 16,500–18,000 protestues janë vrarë dhe 330,000–360,000 janë plagosur. Shumica e viktimave janë nën moshën 30 vjeç. Vetëm në dy ditë raportohet se ndodhi një masakër masive, e përshkruar si më brutalja e regjimit klerikal.Mjekët raportojnë përdorim të gjerë të municioneve të vërteta, snajperëve në çati, mitralozëve të montuar në automjete dhe të shtëna të qëllimshme në kokë, qafë dhe gjoks. Të paktën 700–1,000 persona kanë humbur një sy, ndërsa vetëm një klinikë sysh në Teheran ka dokumentuar rreth 7 mijë raste me dëmtime në sy. Disa burime kanë folur edhe për deri në 8 mijë persona të verbuar në të gjithë vendin.
“Ka kaq shumë lëndime në sy që lidhen me armë zjarri sa nuk dimë se kë të trajtojmë më parë”, tha një oftalmolog.
Shumë të plagosur kanë vdekur për shkak të mungesës së transfuzioneve të gjakut, të cilat në disa raste janë ndaluar nga forcat e sigurisë. Raportohet gjithashtu se persona të plagosur janë rrëmbyer nga sallat e operacionit dhe arrestuar.
Dëshmitarë okularë nga qytete të ndryshme përshkruajnë snajperë që qëllonin nga çatitë, milicinë Basij dhe forcat e IRGC-së që patrullonin me armë të rënda, si dhe trupa që mblidheshin nga rrugët dhe varroseshin fshehurazi në qytete të tjera. Familjeve u janë kërkuar shuma të mëdha parash për të marrë trupat e të afërmve.
Ndërprerja totale e internetit dhe komunikimeve për më shumë se dhjetë ditë ka lënë dhjetëra mijëra familje pa informacion për fatin e të afërmve. Mjekët kanë komunikuar vetëm përmes Starlink, duke rrezikuar jetën e tyre. Një kirurg e quajti situatën “gjenocid nën mbulesën e errësirës dixhitale”.
“Ky është një nivel krejt i ri brutaliteti”, tha Profesor Amir Parasta, një kirurg okulist iraniano-gjerman dhe drejtor mjekësor i Mynihut MED, i cili trajtoi shumë nga të plagosurit gjatë protestave “Gratë, Jeta, Liria” në vitin 2022 dhe ndihmoi në krijimin e një rrjeti mjekësh në të gjithë Iranin që hartuan raportin. “[Në vitin 2022] ata po përdornin plumba gome dhe armë me fishekë që u hiqnin sytë. Këtë herë ata po përdorin armë ushtarake dhe ajo që po shohim janë plagë nga të shtënat me armë zjarri dhe fishekë gome (pellet). Kam folur me dhjetëra mjekë në terren dhe ata janë vërtet të tronditur dhe po qajnë. Këta janë kirurgë që kanë parë luftë”, u shpreh ai.
Udhëheqësi suprem, Ajatollah Ali Khamenei pranoi për herë të parë se “disa mijëra” persona janë vrarë, por ka fajësuar protestuesit, duke i quajtur “instrumente të huaja”. Megjithatë, dëshmitë nga terreni e kundërshtojnë këtë narrativë.
“I thoni të gjithë botës se të premten ata qëlluan me armë zjarri të gjithë. Forcat e IRGC-së po përpiqeshin me qetësi të synonin kokat e njerëzve.”, tha një person nga Mashhadi.
“Vëllai im punon në klinikën Noor. Ai tha se vetëm brenda një nate, dhe vetëm në Teheran, pati më shumë se 800 raste të heqjes së syve për shkak të të shtënave me fishekë në sy. Vëllai im tha gjithashtu se, bazuar në bisedat e tij me mjekë të tjerë në spitale në qytete të tjera, shifrat janë jashtëzakonisht të larta, ndoshta më shumë se 8,000 njerëz të verbuar nga të shtënat me fishekë në të gjithë vendin.”, shtoi një person tjetër, i cili arriti të largohej nga Rasht në Iran javën e kaluar.
“Snajperët në çati po qëllonin njerëzit në pjesën e prapme të kokës. Ne po ecnim kur papritmas disa njerëz pranë nesh u shembën përtokë, të mbuluar me gjak. Kur u përpoqëm të shkonim drejt tyre për të transportuar trupat, ata hapën zjarr mbi ne.”, u shpreh një tjetër.
Një protestues që doli dje nga Irani i tha The Sunday Times se “personat e plagosur që u qëlluan në sy dhe u ishin hequr sytë po rrëmbeheshin menjëherë nga sallat e operacionit nga forcat e sigurisë”.
“Ata kanë ngritur pika kontrolli kudo. Ata kontrollojnë telefonat e të gjithëve, shfletojnë galeritë e tyre të fotove dhe inspektojnë fizikisht trupat e njerëzve. Nëse gjejnë plagë nga plumbat te dikush, ata supozojnë se ka qenë në protesta dhe e arrestojnë menjëherë.”, theksoi një tjetër.
“Një infermiere në Isfahan më tha se çdo dy orë nxirreshin 50 deri në 100 trupa dhe ky është vetëm një spital. Imagjinoni të gjithë qytetin, të gjithë vendin? Të gjithë ata që njoh ose kanë humbur dikë ose dinë për njerëz të zhdukur në rrethin familjar të tyre – jam shumë e shqetësuar për familjen time.”, theksoi Saba Latif, 29 vjeç, nga Isfahani, që aktualisht studion në Çikago.
Protestat, të udhëhequra kryesisht nga Gjenerata Z, u përhapën në të gjitha 31 provincat, të nxitura nga kriza ekonomike, represioni politik dhe kufizimet ndaj grave.
Mes viktimave është edhe Yasin Mirzai, 28 vjeç, student që planifikonte doktoraturë në Universitetin e Bristolit, i vrarë me plumb në kokë gjatë protestës së tij të parë. Para se të dilte në rrugë, ai kishte thënë: “Nëse më vrasin, u thoni të gjithëve se u bëra martir në rrugën e lirisë.”
