Edhe pse vetoja hungareze për Ukrainën e bllokoi miratimin zyrtar të përfundimeve për zgjerimin, Danimarka, si kryesuese aktuale e Unionit, nuk lejoi që mesazhet për Shkupin të mbeteshin në sirtar. Nën etiketën “Përfundimet e Presidencës Daneze”, nga Brukseli u dërgua një sinjal i qartë mbështetjeje, por edhe një kujtesë e rreptë për detyrat e brendshme që mbeten themeli i rrugës evropiane të Maqedonisë së Veriut.
Mesazhi nga kryeqytetet evropiane është i qartë dhe pa ekuivoke: konferenca e dytë ndërqeveritare dhe hapja e “Klasterit Themelor” janë vetëm një hap larg – ndryshimi i Kushtetutës. Këshilli i BE-së konfirmoi se është i gatshëm për vazhdimin e menjëhershëm të negociatave, pa vendime shtesë politike, sapo Maqedonia ta përmbushë obligimin e marrë.
BE-ja e përshëndet faktin që integrimi evropian mbetet prioritet strategjik, por kërkon “veprime të shpejta dhe vendimtare”. Në fokus të kritikave janë:
Sundimi i ligjit: Kërkohet vullnet i fortë për mbrojtjen e pavarësisë së gjyqësorit.
Kodi Penal: Brukseli insiston në një ligj të ri të harmonizuar me standardet evropiane.
Administrata: Kërkohet modernizim urgjent dhe rritje e kapaciteteve.
Ndërsa reformat e brendshme ecin me ritëm të ngadalësuar, Maqedonia e Veriut merr vlerësim maksimal për orientimin e saj gjeopolitik. Këshilli e lavdëroi fuqishëm vendin për harmonizimin e plotë me politikën e jashtme dhe të sigurisë të BE-së, përfshirë masat kufizuese, gjë që interpretohet si sinjal i qartë për pozicionimin strategjik të shtetit.
Brukseli nuk i harron marrëveshjet. Kujtesa për “zbatimin me mirëbesim” të marrëveshjeve me Greqinë dhe Bullgarinë mbetet konstante në çdo dokument. Megjithatë, në planin ekonomik ka lajme pozitive: përparimi i Korridorit hekurudhor 8 vlerësohet si sukses strategjik, ndërsa pagesat e para nga Mekanizmi për Reforma dhe Rritje tashmë po sjellin përfitime konkrete për qytetarët.
