Vendi ka përfituar ndihmë të gjerë nga IPA II për reforma dhe zhvillim, por pavarësisht mbështetjes, kapaciteti i dobët administrativ ka krijuar sfida serioze në zbatimin e programeve. Si pasojë e këtyre mangësive, raporti i KE-së vëren se është shkaktuar një tërheqje automatike kumulative prej 122,053,668.08 euro nga fondet e BE-së. Kjo humbje tregon nevojën urgjente për forcimin e administratës dhe përmirësimin e menaxhimit të fondeve, raporton Portalb.mk.
“Për shkak të kapacitetit të dobët administrativ në kuadër të këtij programi shumëvjeçar, vendi u përball me një tërheqje automatike kumulative prej 122 053 668.08 eurosh”, thuhet në raport.
Mes tjerash përmenden edhe aktivitetet e reja plotësojnë programet që janë ende në proces në kuadër të IPA II (2014-2020). Raporti thekson se është bërë përparim në zbatimin e IPA II për të mbështetur zhvillimin social dhe ekonomik të vendit dhe reformat kryesore strukturore. Ndihma e BE-së në kuadër të IPA II vazhdoi të mbështesë reformat në fushat e sundimit të ligjit, administratës publike dhe financave publike dhe çoi përpara luftën kundër korrupsionit.
“Media, shoqëria civile dhe sektori privat vazhdojnë të përfitojnë nga ndihma kyçe e BE-së, e cila u ofron atyre mundësi për t’u rritur dhe zhvilluar në një mjedis të favorshëm. Në fushën e konkurrueshmërisë dhe zhvillimit të biznesit, u krijua një platformë kombëtare për gratë sipërmarrëse. BE-ja mbështeti Garancinë Rinore ku përfituan mbi 9 900 të rinj në rajon që përballen me papunësinë më të lartë të të rinjve dhe shkallët e larta të braktisjes së shkollës. Ajo gjithashtu ndihmoi fëmijët romë dhe fëmijët me aftësi të kufizuara. Sipas programit shumëvjeçar, një sasi e konsiderueshme e ndihmës financiare të BE-së është ndarë për të mbrojtur mjedisin dhe për të rritur lidhjen me sistemet e transportit të BE-së. Në transport, me mbështetjen e BE-së, ndërtimi i autostradës Gradsko-Drenovë, pjesë e Korridorit X, u finalizua dhe u vu në funksion. Për mjedisin, BE-ja mbështeti zhvillimin e strategjisë kombëtare të monitorimit mjedisor dhe planit të veprimit shoqërues, si dhe një Sistemi Kombëtar të Informacionit Mjedisor të shumëpritur”, thuhet në raport.
Përndryshe, më 4 nëntor u publikua Raporti i Progresit i vitit 2025 për Maqedoninë e Veriut dhe vendet e tjera që aspirojnë BE-në. Sipas raportit, Maqedonia e Veriut mbetet vetëm pjesërisht e përgatitur në luftën kundër korrupsionit dhe nuk ka shënuar progres, ndërsa korrupsioni vazhdon të jetë i përhapur dhe shqetësues. Tragjedia e 16 marsit 2025 në Koçan ekspozoi mangësi serioze në zbatimin e masave antikorrupsion. KSHPK u përball me krizë besueshmërie pas aktakuzës ndaj kryetares së saj, ndërsa institucioni duhet të forcojë udhëzimet, verifikimin e pasurisë dhe mbikëqyrjen e financimit zgjedhor. Prokuroria dhe njësitë hetimore vuajnë nga mungesa e stafit dhe burimeve, ndërsa rastet e korrupsionit të nivelit të lartë shpesh vonohen, parashkruhen ose përfundojnë me dënime minimale. Rekomandimet e vitit të kaluar mbeten të paadresuara. Vendit i kërkohet të miratojë Kodin e ri Penal, të zbatojë strategjitë antikorrupsion dhe të sigurojë burime të mjaftueshme për institucionet kyçe.
