Presidenti amerikan Donald Trump ka njoftuar se ai dhe presidenti rus Vladimir Putin mund të zhvillojnë një takim shumë shpejt për të diskutuar fundin e konfliktit në Ukrainë.
Trump shprehu optimizëm për një zgjidhje të mundshme, duke deklaruar: “Ne do të flasim, dhe mendoj se do të bëjmë diçka të rëndësishme. Ne duam t’i japim fund asaj lufte,” ka thënë Trump gjatë një konference për media në Shtëpinë e Bardhë.
Trump ka nënvizuar se administrata e tij ka pasur tashmë “diskutime shumë serioze” për mënyrën se si mund të përfundojë konflikti. Sipas tij, është një situatë “pa kuptim” dhe “duhet të marrë fund”. Ai nuk ka dhënë detaje se kush nga administrata e tij është përfshirë në këto biseda me rusët, por ka theksuar se dy palët janë duke komunikuar.
Trump gjithashtu shpreson që një takim i mundshëm me Putin do të çojë në përpjekje të reja për paqe, dhe ka thënë se Rusia mund të jetë gjithashtu e interesuar për një takim të tillë.
Në fushatën e tij, Trump ka theksuar se një nga prioritetet e tij do të ishte të përfundonte luftën në Ukrainë brenda 24 orëve nga marrja e detyrës si president. Tani, ai shpreson që të arrijë ta mbyllë këtë konflikt brenda një periudhe gjashtë mujore.
Trump ka qenë kritik i ndihmës që Shtetet e Bashkuara i kanë dhënë Ukrainës, duke thënë se ky ndihmë nuk do të kishte qenë e nevojshme nëse Ukraina do të kishte bërë koncesione para fillimit të luftës. Po ashtu, ai ka insistuar se, nëse do të ishte president, Rusia nuk do të kishte pushtuar kurrë Ukrainën.
Në një intervistë të fundit për televizionin shtetëror rus, Vladimir Putin e ka lavdëruar Trumpin si një “burrë të mençur dhe pragmatik” që është fokusuar në interesat amerikane. Putin ka shtuar se marrëdhëniet mes të dyve kanë qenë gjithmonë të bazuara në një stil biznesor dhe pragmatik, me një mirëbesim të vazhdueshëm.
Sidoqoftë, Putin ka refuzuar mundësinë e bisedimeve të drejtpërdrejta me presidentin ukrainas, Volodymyr Zelensky, duke deklaruar se ai nuk e konsideron Zelenskyn si një lider legjitim të Ukrainës.
Zgjedhjet presidenciale në Ukrainë, të planifikuara për më 31 mars 2024, janë shtyrë për shkak të gjendjes së luftës në vend. Shteti i Ukrainës ndodhet ende nën gjendje të luftës, duke bërë të pamundur mbajtjen e një procesi zgjedhor në kushte normale.
Përfundimisht, Trump ka shpresë për një zgjidhje të shpejtë dhe të qëndrueshme për këtë konflikt të përgjakshëm, dhe mundësia e një takimi të mundshëm me Putin, si dhe mundësia për të diskutuar me presidentin ukrainas, mund të jetë një hap drejt arritjes së një paqeje afatgjatë.
