Deputeti Halil Snopçe dhe kryeministri Hristijan Mickoski i dëshiruan fat njëri-tjetrit, ndërsa koalicioni qeveritar do të vazhdojë, siç paralajmëruan nga partitë. Pasi Mickoski tha “i qoftë me fat” për paralajmërimin e Snopçes se VLEN do të largohet nga koalicioni qeveritar nëse votohet Ligji për branitellat, deputeti ia ktheu në të njëjtën mënyrë. Snopçe në reagim të shkruar, theksoi se deklarata e tij nuk paraqet kërcënim.
“Kemi obligim të përbashkët para së gjithash ta kthejmë shpresën te qytetarët se ky shtet do të normalizohet dhe do të jetë më mirë. Ne jemi partnerë dhe partneriteti jonë bazohet në raportin e fuqive, e jo në raportin e fuqisë. Kështu funksionojmë dhe shpresoj se ashtu do të vazhdojmë. Kuptohet, secili që na dëshiron fat edhe ne i dëshirojmë fat”, theksoi Halil Snopçe, koalicioni VLEN.
Paraprakisht ministri nga radhët e VLEN, Arben Taravari, theksoi se raportet në Qeveri janë korrekte por ekzistojnë disa keqkuptime për shkak të të cilave duhet më shumë kohë për sinkronizim dhe koordinim. Edhe nga partia qeverisëse VMRO-DPMNE theksuan se raportet në koalicion janë stabile.
“Se koalicioni qeveritar është i qëndrueshëm flet edhe fakti që në Kuvend kemi shumicë prej dy të tretave. Qeveria është e fokusuar në projektet dhe masat që janë për jetë më të mirë për qytetarët dhe raportet janë në drejtim të dialogut stabil politik për zhvillim dhe transformim ekonomik”, shtoi Marija Miteva, VMRO-DPMNE.
Raportet qeveritare i komentuan edhe socialdemokratët. Ata i bënë thirrje Mickoskit dhe Snopçes që të punojnë, e jo të debatojnë.
“Nuk është e rëndësishme fare nëse konflikti është real apo jo, ai në fund rezulton me Qeveri të dobët që i keqpërdor ndjenjat e qytetarëve. Këto konflikte brenda Qeverisë dhe për shkak të përplasjeve publike nuk janë të panjohura, këtë e bënte VMRO-DPMNE dhe BDI gjatë gjithë mandati. Në opinion grindeshin, në tavolinë ndanin bizneset”, thonë nga LSDM.
Në Qeveri deri më tani për disa tema kishte qëndrime të ndryshme mes partnerëve VMRO-DPMNE, VLEN dhe ZNAM. Mes tyre edhe përdorimi i flamurit, balancuesi, Akademia shqiptare për shkencë dhe art, si dhe branitellat. Paraprakisht kryeministri Mickoski deklaroi se në një familje nuk është patjetër që të gjithë të pajtohen.
