“Ndryshimet në Kodin Penal ishin gabim”, ka pranuar kryetari i ri i LSDM-së, Venko Filipçe. Ai i propozoi VMRO-DPMNE-së miratimin e ligjit të ri me konsensus, hartimi i të cilit filloi në vitin 2017, kur ministre ishte Renata Deskoska dhe një grup ekspertësh e përfundoi dhe e dorëzoi në Ministrinë e Drejtësisë vetëm këtë vit, pak para zgjedhjeve. Ai mendon se ligji duhet të hidhet në diskutim publik dhe të votohet bashkërisht, për të korrigjuar gabimin me amendamentet, me të cilat u fshi paragrafi 5 i nenit 353 të Kodit Penal, dhe disa nga procedurat gjyqësore ndaj zyrtarëve u ndërprenë, dhe disa u vjetëruan. Ndryshimet u miratuan vitin e kaluar, pas një procedure të shpejtë dhe me flamur europian, gjë që shkaktoi reagime të furishme në opinion, por edhe nga BE dhe SHBA.
Kryeministri refuzoi Filipçen, duke thënë se do të miratohet një ligj i ri, por sipas standardeve evropiane, jo sipas nevojave të dikujt.
Në takimin e sotëm të parë zyrtar me gazetarë, pasi u bë kryetar i LSDM-së, Filipçe ka kritikuar edhe qeverisjen njëmujore të VMRO-DPMNE-së. Ai akuzoi se po kthehet politika e vjetër në të cilën Maqedonia është parajsë për fuqinë punëtore të lirë, se nuk kanë paraparë rritje të pagave në asnjë sektor, madje nuk kanë as plan dhe udhërrëfyes për politikën e jashtme të vendit dhe negociatat me BE.
Ai kritikoi edhe kredinë nga Hungaria, për të cilën thotë se ka një normë të lartë interesi dhe nuk ka mekanizëm kontrolli. Mickoski i tha atij se qeveria e kaluar kishte vjedhur para sa katër kredi të tilla dhe nëse i kthenin nuk do të kishte nevojë për kredi. Ai ka përsëritur akuzat ndaj ish-ministrit për manipulim tenderash në kohën kur ka qenë ministër, për lidhjen me familjen Panovski dhe rastin e Onkologjisë, si dhe se ka një haciendë miliona dollarëshe me ujë dhe automjete luksoze. Filipçe, nga ana tjetër, pretendon se prona luksoze është e babait të gruas së tij, të cilën ai as nuk e ka vizituar dhe supozon se është në Nerez.
Sa i përket partisë ai thotë se po kthehet në formë dhe se kriza nga zgjedhjet ka kaluar. Ai nuk e fsheh se anëtarësimi është i përçarë, por thotë se kjo është pasojë e mungesës së komunikimit dhe sfidave në vendbanimet, prandaj përpiqet t’u afrohet të gjithëve dhe bashkërisht t’u gjejë zgjidhje problemeve.
Ai bëri të ditur se gjatë verës do të formohen grupet punuese që do të fillojnë përgatitjet për zgjedhjen e delegatëve të rinj për kongresin e partisë, do të zgjidhet edhe kryesia krejtësisht e re, ndërsa procesi pritet të përfundojë deri në tetor.
