Kryetari i ASH-së, Arben Taravari ka mohuar se ai do të jetë kryeministri i parë shqiptar në Maqedoninë e Veriut.
Ai këtë e ka bërë të ditur për Lajm.
“JO, sigurisht nuk do të jem. Unë u habita, ma dërguan disa miq dhe shokë këtë informatë. As që është diskutuar kjo temë në parti apo me ndonjë parti tjetër. Kështu që ne si ASH i vazhdojmë aktivitetet tona, i kemi planet tona dhe as që diskutohet për këtë temë”, theksoi Taravari pas një lajmi të plasuar se kjo ofertë i është bërë nga kryetari i BDI-së, Ali Ahmeti.
.
LAJM: A ju ka ofruar Ali Ahmeti një gjë të tillë?
“Unë me Ali Ahmetin jam takuar në komunën e Gostivarit. Kemi biseduar për tema të ndryshme, por për këtë temë aspak nuk kemi diskutuar. As që e kam ndërmend ta diskutoj këtë temë. Bile mendoj se është temë që më shumë është thashetheme se ka të bëjë diçka me realitetin. Kishte spekulime të ndryshme se Aleanca shkon me BDI-në, listat janë gati dhe ka 4-5 muaj që unë e përsëris që Aleanca do të del vetë dhe në mbledhjen e fundit të kryesisë kishim konstatim se Aleanca shkon vetë në zgjedhje dhe nuk shkon me BDI-në”, deklaroi Taravari për Lajm.
