Kryetari i Parlamentit të Kosovës, Glauk Konjufca tha sot se propozimi i diplomatëve perëndimorë për krijimin e Asociacionit të komunave me shumicë serbe, që i është dorëzuar qeverisë së Kosovës, sipas tij, është plotësisht në përputhje me Kushtetutën e Kosovës dhe nuk krijon një nivel të tretë pushteti.
“Nuk e kam shqyrtuar me kujdes por vetëm një shikim sipërfaqësor, por është plotësisht në përputhje me Kushtetutën e Kosovës”, tha zoti ai. Konjufca tha se gjithsesi drafti final duhet të hartohet nga qeveria e Kosovës dhe ai nuk duhet të negociohet me Serbinë.
Dallimi që unë mendoj që është esencial për Republikën e Kosovës dhe institucionet tona shtetërore ka të bëjë më faktin që për Asociacion nuk duhet të negociohet, nuk është asociacioni le të themi temë qendrore e negociatave me Serbinë”, tha zoti Konjufca.
Ai i bëri këto komente pak ditë pasi të dërguarit perëndimorë paraqiten në Prishtinë dhe Beograd një plan për zbatimin e marrëveshjes së arritur me herët gjatë këtij viti në Bruksel dhe në Ohër për të cilin pritet që nesër të diskutohet në Bruksel.
Zyrtarët evropianë i thanë të martën Zërit të Amerikës se pjesë e diskutimeve të Brukselit do të jetë edhe “një propozim modern evropian për statutin e Asociacionit të komunave me shumicë serbe.”
Kryeministri i Kosovës Albin Kurti dhe presidenti serb Aleksandar Vuçiç pritet të takohen të enjten ndaras me presidentin francez, kancelarin gjerman, kryeministren italiane dhe udhëheqës të Bashkimit Evropian, për të diskutuar mënyrat për të zbatuar marrëveshjen e arritur në fillim të këtij viti në Bruksel dhe Ohër.
“Presim nga të dyja palët, Kosova dhe Serbia, që menjëherë dhe pa kushte t’i kthehen përmbushjes së detyrimeve nga dialogu dhe shtensionimit të situatës”, tha zëdhënësi i Bashkimit Evropian Peter Stano, duke nënvizuar se nuk do të ketë takim të nivelit të lartë mes palëve nesër në Bruksel.
Qeveria e Kosovës tha të mërkurën se “kryeministri Albin Kurti ka shprehur dakordimin e tij që plani i paraqitur nga diplomatët, për të cilin nuk janë dhënë hollësi, të jetë kuadri i vazhdimit të diskutimeve të mëtejshme me shtetet aleate, Shtetet e Bashkuara, Gjermaninë, Francën dhe Italinë, që do të duhej të siguronte një komponent të fuqishëm të sigurisë dhe gjithashtu të fuqizonte perspektivën e anëtarësimit në organizata ndërkombëtare”.
Diplomatët shpresojnë që të arrihet një përparim deri në takimin udhëheqësve të vendeve anëtare të Bashkimit Evropian që fillon të enjten pasdite.
Shtimi i trysnisë perëndimore për zbatimin e marrëveshjes pasoi sulmin e 24 shtatorit kur një grup serbësh të armatosur sulmoi policinë e Kosovës në fshatin Banjskë në veri duke vrarë një oficer policie. Tre sulmues u vranë gjatë përleshjeve, që nxitën shqetësime për qëndrueshmërinë në rajon.
Diplomatët perëndimorë thonë se 24 shtatori dëshmoi rëndësinë e normalizimit të marrëdhënieve Kosovë – Serbi./VOA/
