Ardita Sinani, Këshilltare e kryeministrit të Kosovës, Albin Kurti për Luginën e Preshevës ka bërë të ditur se çështja e keqtrajtimit të shqiptarëve të Luginës së Preshevës nga Serbia do të ngrihet edhe në Parlamenti Evropian.
“Pas ngritjes së problematikës së shqiptarëve të Luginës së Preshevës në Kongresin e Senatin Amerikan dhe në Organizatën e Kombeve të Bashkuara, adresa jonë e rradhës do të jetë Parlamenti Evropian.
Nga nesër, së bashku me anëtarët tjerë të delegacionit nga Lugina e Preshevës, do të jem në vizitë 3 ditore në Bruksel për të ngritur problematikën e shqiptarëve të Preshevës, Medvegjës e Bujanocit në Parlamentin Evropian dhe Këshillin e Evropës. Për tre ditë në Bruksel do të zhvillojmë 12 takime me udhëheqësit më të lartë të Këshillit të Evropës dhe Parlamentit Evropian.
Pozita e vështirë e pakicës shqiptare në Serbi dhe diskriminimi konsistent do të jenë thelbi dhe tema kryesore e këtyre takimeve jashtëzakonisht të rëndësishme” ka bërë të ditur Sinani.
Ajo shton gjithashtu se Serbia duhej të kushtëzohej në rrugën drejt integrimit në Bashkimin Evropian si pasojë e mosplotësimit të të drejtave të shqiptarëve në Serbi.
“Kushtëzimi i rrugëtimit të Serbisë në integrimet evropiane do të duhej të kushtëzohej me realizimin dhe plotësimin e të drejtave të shqiptarëve në Serbi në përgjithësi, e në veçanti në komunat Preshevë, Medvegjë e Bujanoc. Zgjidhja më afatgjate dhe më e duhura do të ishte implementimi i reciprocitetit në të drejta të serbëve që jetojnë në Kosovë dhe shqiptarëve në Serbi”, përfundon këshilltarja e kryeministrit Kurti.
/rtsh.al/
