Postimi i plotë
I gëzohemi aplikimit të Republikës së Kosovës për anëtarësim në Këshillin e Evropës, hap ky sa i domosdoshëm aq edhe në kohën e duhur, duke marrë parasysh lëvizjet gjeopolitike në kontinentin tonë dhe ngritjen e hovshme të një rendi të ri botëror.
Pas përjashtimit të Rusisë nga Këshilli i Evropës, anëtarësimi i Kosovës paraqet një mundësi të artë për këtë organizatë të rëndësishme të mbrojtjes së drejtave të njeriut, demokracisë dhe shtetit të së drejtës, për të afirmuar vlerat mbi të cilat ajo është ndërtuar.
I bëjmë thirrje Qeverisë së Maqedonisë së Veriut që të mbështesë në mënyrë aktive këtë proces, duke punuar krahas aleatëve tonë për të izoluar Serbinë dhe çdo shtet tjetër që ka për synim mohimin e pavarësisë së Republikës së Kosovës, e cila më shumë së kurdoherë është garancë e paqes dhe stabilitetit në Ballkanin perëndimor.
