Askush nuk i parandalon fqinjët tanë të vetëvendosin, por kjo nuk mund të bëhet në bazë të gënjeshtrave historike, deklaroi ministrja e Punëve të Jashtme e Bullgarisë, Ekaterina Zaharieva, njofton Portalb.mk.
“Ajo vetëvendosje, atë komb që e krijojnë prej vitit 1944, nuk duhet të bazohet në gënjeshtra dhe fushatë antibullgare, por në të vërtetë. Baza e marrëveshjes sonë është historia e përbashkët. Askush nuk e konteston të drejtën e Maqedonisë të ketë shtet dhe si të vetëvendosë. E drejta e vetëvendosjes është e drejtë njerëzore”, theksoi Zaharieva për Nova TV bullgare.
Shefja e diplomacisë bullgare theksoi se në të gjitha dokumentet, përfshirë edhe ato të BE-së për fillim të negociatave për anëtarësim e vendit, përmendet edhe Marrëveshja për miqësi dhe fqinjësi të mirë që Maqedonia e Veriut dhe Bullgari e arritën në gusht të vitit 2017.
Kohë më parë eurodeputeti Andrej Kovaçev kërcënoi se Bullgaria mund të vendosë veto në fillim të negociatave të vendit me BE-në, nëse Komisioni i përbashkët historik nuk fillon me punë deri në qershor.
Zaharieva javën e kaluar refuzoi ta komentojë qëndrimin e këtillë të Kovaçevit, por potencoi se insiston që Komisioni të vazhdojë me punë, duke shtuar se gjatë procesit të negociatave të një vendi për anëtarësim në BE, nevojitet pëlqimi i secilit shtet anëtar të Unionit për hapje dhe mbyllje të kapitujve dhe për tërë procesin negociues.
Ministrja bullgare me atë rast shtoi se Bullgaria me vite është një ndër mbështetësit më seriozë të Maqedonisë së Veriut, por se insiston në përmbushje të dispozitave nga Marrëveshja për miqësi, fqinjësi të mirë dhe bashkëpunim.
Ndërkqa, në tetor të vitit të kaluar, Qeveria dhe Parlamenti bullgar miratuan deklaratën, që mbështeste nisjen e bisedimeve për anëtarësimin e Maqedonisë së Veriut në Bashkimin Evropian, por vendosën një sërë kushtesh siç janë: ndryshimi i librave të historisë në një afat të shkurtër kohor, heqja e të gjitha pllakave përkujtimore me mbishkrime “okupatorët fashistë bullgarë” etj. Dy popujt kanë konteste edhe sa i përket prejardhjes së Goce Dellçevit dhe Kërste Misirkovit, dy personaliteteve të njohura që për maqedonasit konsiderohen si figura të rëndësishme të historisë maqedonase, njëjtë sikur që konsiderohen edhe për bullgarët.
