Dygjuhësia në polici ende mbetet vetëm në këtë kornizë shembull se si do të dukej emblema. Realitet ende nuk është bërë! Ministri i punëve të Brendshme, Oliver Spasovki, çdo herë që pyetet për dygjuhësinë në uniforma, thotë se procedura është në vijim. Të njëjtën përgjigje për TV21 e dha edhe sot.
“Është në procedurë, kur të përfundojë, do të përfundojnë të gjitha aktivitetet. Kur duhet të përfundojnë? Shpresoj që së shpejti”, tha Oliver Spasovski, ministër i Brendshëm.
Të njëjtën përgjigje Spasovski e pat dhënë edhe para një viti.
“Në atë periudhë u ngrit procedura në lidhje me realizimin e dispozitave ligjore, ajo procedurë është para qeverisë, sapo të përfundojë, do të fillojmë me zbatim”, theksoi Oliver Spasovski, ministër i Brendshëm.
Ka kaluar më shumë se një vit që kur ish-Ministri i Brendshëm i qeverisë teknike, Agim Nuhiu, i dërgoi në Qeveri aktet normative për uniforma dygjuhëshe, por deri më sot asgjë nuk ka lëvizur. Disa muaj pas TV21 e pati pyetur edhe zv/kryeministrin e parë Artan Grubi, i cili thoshte se procedura duhet të përsëritet.
“Akti normativ i z.Agim Nuhiu gjersa ushtronte detyrën e ministrit të Punëve të Brendshme ishte gjatë kohës së Qeverisë teknike dhe përballjes së pandemisë, do ta ripërsërisim sepse gjithsesi se duhet të respektohen ligjet, në veçanti ligji për përdorimin e gjuhëve dhe nuk shoh ndonjë rezervë nga partneri ynë i koalicionit”, tha Artan Grubi, zv/kryeministër i parë (18.03.2021).
Edhe sot përmes mesazhit e pyetëm Grubin se deri ku është procedura për uniformat dygjuhëshe, por nuk morëm përgjigje.
Përndryshe, që në gusht të 2020, ish-Ministri Agim Nuhiu nënshkroi aktet normative që emblemat e policisë të jenë edhe në shqip, ndërsa për TV21 pati sqaruar se këto akte do të duhet të marrin edhe pëlqimin e Qeverisë dhe më pastaj të hapen edhe procedurat e tenderimit që të munden edhe praktikisht të intervenohet në emblemë. Dygjuhësia në uniformat e policisë bazohet në dispozitat e nenit 8 të ligjit për gjuhët.
