TV21 mëson se do të anulohet marrëveshja me “Energoinvest” nga Sarajeva për ndërtimin e largpërçuesit me Shqipërinë. MEPSO tashmë është në konsultim me Qeverinë dhe pret vendim përfundimtarë që me shumë gjasa do të jetë anulimi i marrëveshjes me kompaninë nga Sarajeva në vlerë prej 17 milionë eurove. Pikërisht tema e parë në emisionin “Biznes 21” ishte hulumtimi “Ku përfunduan 50 milionë euro për lidhjen tonë energjetike me Shqipërinë?!” Si mundet, pas 10 viteve premtime dhe 50 milionë eurove të siguruara që nga viti 2015 sot kemi vrimë financiare dhe projektet strategjike nuk lëvizin nga vendi.
Largpërçuesi interkonektor me Shqipërinë ishte edhe temë e pyetjeve të deputetëve në Kuvend. Kryeministri Hristijan Mickoski nga foltorja që nga fundi i nëntorit paralajmëroi anulim të marrëveshjes dhe akuzoi për krim me përmasa epike.
Hulumtimi i Biznes 21 nga terreni zbuloi se ka ngecur njëra pjesë nga projekti – Largpërçuesi Manastir 2 – Elbasan. Në vend të largpërçuesit të ndërtuar, atje hasëm në livadhe të shkreta. Pajisja e cila është sjellë me vite qëndron në depot e vendit. Kompania Energoinvest nga Sarajeva edhe përkundër afateve të tejkaluara, kërkon 7 deri në 8 milionë euro Aneks të marrëveshjes. Zbuluam se edhe nënkontraktor i Energoinvest në 2021 është kompania e biznesmenit Nefi Useini, i njohur në opinion si këshilltar i atëhershëm në komunën e Ohrit, i cili u akuzua për sjellje të dhunshme dhe për ndërtim pa leje.
Në pjesën tjetër të projektit, Trafostanica afër Ohrit punët zhvilloheshn me dinamikë të përshpejtuar. Atje kontraktor është Konçar nga Zagrebi që e fitoi tenderin në vlerë prej 17 milionë eurove. Hulumtimi tregoi se këtë pranverë kompania mori edhe Aneks me 3 milionë euro shtesë.
