Presidenti amerikan Donald Trump nënshkroi të hënën një urdhër ekzekutiv gjithëpërfshirës duke vendosur një afat 30-ditor për prodhuesit e barnave për të ulur koston e barnave me recetë në SHBA, ose përndryshe do të përballen me kufizime të reja mbi atë që do të paguajë qeveria.
Urdhri i bën thirrje departamentit të shëndetësisë, të udhëhequr nga Robert F. Kennedy Jr, të ndërmjetësojë çmime të reja për barnat, transmeton Telegrafi.
Nëse nuk arrihet një marrëveshje, do të hyjë në fuqi një rregull i ri që do të lidhë çmimin e asaj që SHBA-të paguajnë për ilaçet me çmimet më të ulëta të paguara nga vendet e tjera.
“Do të barazohemi. Të gjithë do të paguajmë njësoj. Do të paguajmë atë që paguan Evropa”, tha Trump gjatë një konference për shtyp të hënën në mëngjes.
Nuk është e qartë se çfarë ndikimi – nëse ka – do të ketë urdhri ekzekutiv i presidentit republikan tek miliona amerikanë që kanë sigurim shëndetësor privat.
Qeveria federale ka fuqinë më të madhe për të formësuar çmimin që paguan për barnat e mbuluara nga Medicare dhe Medicaid.
Qeveria federale shpenzon qindra miliarda dollarë për ilaçe me recetë, injeksione, transfuzione dhe ilaçe të tjera çdo vit përmes Medicare, i cili mbulon gati 70 milionë amerikanë të moshuar.
Ndërkohë, Medicaid mbulon gati 80 milionë njerëz të varfër dhe me aftësi të kufizuara në SHBA.
Përpara nënshkrimit, lobi kryesor farmaceutik i vendit të dielën kundërshtoi planin e Trump, duke e quajtur atë një “marrëveshje të keqe” për pacientët amerikanë.
Prodhuesit e ilaçeve kanë argumentuar prej kohësh se çdo kërcënim për fitimet e tyre mund të ndikojë në kërkimin, që ata bëjnë për të zhvilluar ilaçe të reja.
“Importimi i çmimeve të huaja do të shkurtojë miliarda dollarë nga Medicare pa asnjë garanci se ndihmon pacientët ose përmirëson aksesin e tyre në ilaçe”, tha Stephen J. Ubl, president dhe CEO i PhRMA, në një deklaratë.
“Kjo rrezikon qindra miliarda që kompanitë tona anëtare po planifikojnë të investojnë në Amerikë, duke na bërë më të varur nga Kina për ilaçe inovative”, shtoi Ubl.
Qasja e ashtuquajtur e “kombit më të favorizuar” të Trump ndaj çmimeve të ilaçeve të Medicare, ka qenë e diskutueshme që kur ai u përpoq ta zbatonte atë gjatë mandatit të tij të parë.
Ai nënshkroi një urdhër ekzekutiv të ngjashëm në javët e fundit të presidencës së tij, i cili bëri thirrje që SHBA-të të paguajnë vetëm një çmim më të ulët se vendet e tjera për disa ilaçe – injeksione ose ilaçe kundër kancerit të dhëna përmes infuzioneve – të administruara në zyrën e një mjeku.
Ky urdhër ekzekutiv i ngushtë u përball me pengesa, me një urdhër gjykate që bllokoi hyrjen në fuqi të rregullit nën administratën e presidentit Joe Biden.
Industria farmaceutike argumentoi se përpjekja e Trump në vitin 2020, do t’u jepte qeverive të huaja “dorën e sipërme” në vendosjen e vlerës së ilaçeve në SHBA.
Trump mbrojti vazhdimisht kompanitë farmaceutike, duke fajësuar në vend të kësaj vendet e tjera për çmimin e lartë që amerikanët paguajnë për ilaçet, gjatë një fjalimi të gjerë në Shtëpinë e Bardhë të hënën.
Presidenti ishte i shoqëruar nga Kennedy, administratori i Qendrave për Shërbimet Medicare dhe Medicaid, Dr. Mehmet Oz, komisioneri i Administratës së Ushqimit dhe Barnave, Dr. Marty Makary, dhe drejtori i Instituteve Kombëtare të Shëndetit, Jay Bhattacharya.
Megjithatë, ai i kërcënoi kompanitë me hetime federale mbi praktikat e tyre dhe hapjen e tregut të ilaçeve në SHBA, për të sjellë më shumë ilaçe të importuara nga vendet e tjera
