Prof. Dr. Zehra Hajrulai-Musliu është një nga figurat e shquara të arsimit të lartë dhe kërkimit shkencor në fushën e mjekësisë veterinare dhe sigurisë ushqimore në Republikën e Maqedonisë së Veriut dhe më gjerë. Me një përkushtim të palëkundur ndaj dijes, cilësisë dhe standardeve shkencore, ajo ka ndërtuar një karrierë të gjatë dhe të respektuar akademike, duke kontribuar ndjeshëm në zhvillimin institucional, shkencor dhe profesional të Fakultetit të Mjekësisë Veterinare në Shkup.
Studimet universitare i përfundoi në Fakultetin e Shkencave Natyrore në Universitetin e Prishtinës në drejtimin Kimi, ndërsa studimet pasuniversitare i kreu në Universitetin e Zagrebit, ku fitoi gradën Master i Shkencave në Kimi (biokimi). Gradën Doktor i Shkencave e mori në Universitetin “Shën Kirili dhe Metodi” në Shkup, në Fakultetin e Mjekësisë Veterinare, duke kurorëzuar formimin e saj të lartë akademik me një kërkim shkencor me rëndësi në fushën e biokimisë dhe mjekësisë veterinare.
Karrierën profesionale e filloi në Institutin Veterinar në Shkup, për të vazhduar më pas në Fakultetin e Mjekësisë Veterinare, ku ka dhënë kontribut të jashtëzakonshëm në mësimdhënie, kërkim shkencor dhe menaxhim akademik. Si profesoreshë e rregullt, ajo ka edukuar gjenerata të tëra studentësh, duke kultivuar te ta përkushtimin ndaj standardeve të larta profesionale, etikës akademike dhe përgjegjësisë shoqërore.
Fusha e saj e ekspertizës përfshin kiminë analitike, sigurinë dhe cilësinë e ushqimit, mikotoksikologjinë, reziduet dhe kontaminantët në ushqim dhe ushqim për kafshë, si dhe sistemet e sigurimit të cilësisë laboratorike. Përmes pjesëmarrjes aktive në konferenca, kongrese dhe projekte ndërkombëtare, ajo ka përfaqësuar me dinjitet institucionin dhe vendin në forume shkencore në Evropë dhe më gjerë.
Prof. Dr. Hajrulai-Musliu ka ushtruar një sërë funksionesh me përgjegjësi të lartë, ndër to Zëvendësdekane për shkencë, Udhëheqëse e Laboratorit për cilësinë e ushqimit dhe ushqimit për kafshë, koordinatore e programeve ndërkombëtare si CEEPUS dhe VetNEST, si dhe kryetare e studimeve të doktoraturës në fushën “Siguria e Ushqimit”. Ajo ka qenë anëtare e bordeve shkencore, komisioneve për akreditim dhe vlerësim të arsimit të lartë, si dhe e komisioneve për avancime akademike dhe çmime shtetërore.
Fituese e çmimit vjetor të Shkenctares së vitit të ndarë nga UNDP dhe nga Rrjeti i grave në Shkencë në RMV-ut.
Kontributi i saj i vazhdueshëm në zhvillimin e standardeve të sigurisë ushqimore, në forcimin e kapaciteteve laboratorike dhe në avancimin e kërkimit shkencor e vendos Prof. Dr. Zehra Hajrulai-Musliu ndër personalitetet më të respektuara të fushës së saj.
Me integritet profesional, përkushtim akademik dhe vizion shkencor, ajo mbetet një shembull i përkushtimit ndaj dijes dhe një frymëzim për komunitetin akademik dhe brezat e rinj të studiuesve.
TETOVARJA Prof. Dr.ZEHRA HAJRULLAI- MUSLIU, fituese e çmimit të Rrjetit të Grave për Shkencë
