Edhe pse Fatlind Ajdini ushtrues i detyrës drejtor i Qendrës për Kulturë në Tetovë dy herë ka dhënë dorëheqje, Ministria e Kulturës nuk ia kanë pranuar asnjërën dhe siç tregon ai, nuk i kanë dhënë asnjë sqarim se pse.“Arsyeja për dorëheqjen time janë pamundësia për të menaxhuar me projektin e madh të Teatrit dhe Bibliotekës së Tetovës. Është një ndër investimet më të mëdha buxhetore për vitin 2021 dhe i është dhënë në dorëzim një institucioni të vogël siç është Qendra e Kulturës e cila nuk ka kapacitete, kuadro për të menaxhuar një projekt kaq të madh. Kjo është arsyeja kyçe dhe e vetme për dhënien e dorëheqjes”, tha Fatlind Ajdini – u.d drejtor i Qendrës për Kulturë – Tetovë.Të pyetur se pse nuk po e pranojnë dorëheqjen e ushtruesit të detyrës, nga Ministria e Kulturës i thanë TV21 se do ta bëjnë këtë dhe do të ketë konkurs të ri.“Ministria e Kulturës do ta pranojë dorëheqjen dhe aktualisht është në kërkim të një personi tjetër për të ushtruar detyrën e drejtorit”, thonë nga Ministria e Kulturës.
Ajdini thotë se mund të qëndrojë drejtor nëse Ministria ia heq Qendrës për Kulturë kompetencat për Teatrin dhe Bibliotekën, në të kundërtën shpreson që ministria ta shpallë konkursin e dytë, pasi që në parin, në dhjetor 2024, u paraqit vetëm një kandidat që nuk i plotësonte kushtet.
Televizioni 21 mëson se në ndarjen e resorëve, posti i drejtorit të Qendrës për Kulturë në Tetovë i takon partisë Alternativa në kuadër të koalicionit VLEN, e cila nuk po arrin të gjejë një kuadër që do t’i plotësonte kushtet.
Përndryshe, projekti i Teatrit dhe Bibliotekës së Tetovë në vitin 2025 mbush plot 11 vite që ka nisur dhe ende nuk ka përfunduar. Për të është hapur lëndë në Prokurori.
