Kryetari i Aleancës për Shqiptarët, Arben Taravari, në intervistën për emisionin Debat Arb në Tv Arbëria ka zbuluar planin e liderit të VMRO-DPMNE-së, Hristijan Mickoski, për zgjedhjet lokale në Maqedoninë e Veriut. Taravari theksoi se përmes kandidaturave të pavarura dhe marrëveshjes me VLEN-in, Mickoski synon një “kthesë të madhe” në komunat me shumicë shqiptare.
Sipas Taravarit, strategjia e Mickoskit bazohet në tre pika: që kryesuesit e Këshillave Komunale të jenë kuadro të VMRO-DPMNE-së, që sekretarët e komunave të jenë maqedonas dhe që një nga ndërmarrjet komunale më të fuqishme në çdo komunë shqiptare të drejtohet nga kuadro të partisë së tij.
“Mickoski u thotë: unë u përkrah në komunat urbane ku ka maqedonas, por me kusht që kryetari i këshillit të jetë maqedonas – njësaj sikurse kryetari i parlamentit është shqiptar, sekretari i komunës të jetë maqedonas dhe drejtori i një ndërmarrjeje publike në atë komunë të jetë maqedonas. Ku është ideja? Mbledhjet e Këshillit Komunal në Tetovë, Gostivar, Strugë, Dibër, që nga viti 1975 janë drejtuar në gjuhën shqipe. Tani, në vitin 2025, ne po lejojmë që ato të drejtohen në maqedonisht,” tha Taravari.
Ai paralajmëroi se ky plan i kryeministrit maqedonas do të dobësonte pozitën e shqiptarëve në pushtetin lokal, duke e kthyer kryetarin shqiptar të komunës në një figurë formale, “njësoj si ministrat shqiptarë në Qeveri.” Taravari tha se kjo ishte marrëveshja që duhet të implementohet, por fatmirësisht, me largimin e Aleancës për Shqiptarët që ishte me besueshmëri 3 me 1 përkah partive të tjera të VLEN-it, kjo marrëveshje e Mickoskit ra në ujë. Flaka Media
