Ministri i Punëve të Brendshme, Xhelal Sveçla ka bërë të ditur se është arrestuar personi i cili ka kërcënuar ditë më parë nënkryetaren e Komunës së Leposaviqit.
Sveçla ka shkruar se krimi dhe kërcënimet nuk kalojnë.
“Pardje është ndaluar kontrabanda me mallra, dje është konfiskuar vetura në kërkim ndërkombëtar, sot është arrestuar personi që ka kërcënuar nënkryetaren e Komunës së Leposaviqit, znj. Dragana Miletic. Të gjitha këto në veri të vendit. Koha e pandëshkueshmërisë ka marrë fund”, ka shkruar ministri.
Nënkryetarja e Komunës së Leposaviqit, Dragana Miletiq, kishte raportuar në Polici se është kërcënuar, derisa kishte kërkuar edhe mbrojtje nga Policia e Kosovës.
Dragana Miletiq është zgjedhur nënkryetare e Komunës së Leposaviqit, komunë kjo e cila tash drejtohet nga Lulzim Hetemi.
