SPB Manastir ka paraqitur kallëzim penal kundër A.P. (68) nga Manastiri për dyshime mbi kryerjen e veprës penale “keqpërdorim i pozitës dhe autorizimeve zyrtare”, dhe kundër M.D. (60) nga Resnja për “keqpërdorim të të dhënave personale”.
E para e kallëzuar, në cilësinë e drejtoreshës së Institucionit Publik Shëndetësor – Spitali Special në Oteshovë, gjatë viteve 2022 dhe 2023 ka lidhur tre kontrata pune me një person nga Resnja, nga të cilat vetëm dy janë nënshkruar prej saj, ndërsa e treta është nënshkruar nga një person i tretë. Sipas hetimeve, personi për të cilin janë lidhur kontratat nuk ka qenë asnjëherë i pranishëm apo i angazhuar në spital.
Po ashtu, e njëjta ka përdorur token-in zyrtar dhe ka nënshkruar urdhërpagesat nga llogaria rrjedhëse e institucionit në vlerë totale prej 145.904 denarësh, duke shkaktuar dëm financiar ndaj Ministrisë së Shëndetësisë.
E dyta e kallëzuar, në cilësinë e juristes dhe këshilltares për burime njerëzore, ka përgatitur tre kontratat e lartpërmendura pa pëlqimin e personit në fjalë, duke keqpërdorur të dhënat e tij personale dhe numrin e llogarisë bankare. Pagesat janë bërë për shërbime fiktive, duke i shkaktuar dëm të njëjtë financiar institucionit.
