Prindërit dhe të afërmit e viktimave nga zjarri në diskotekën “Pulse” përmes një marshimi paqësor nën moton “Marshim për engjëjt” kërkuan drejtësi mes dhimbjeve dhe lotëve.
Marshimi paqësor nisi në qendrën tregtare, dhe prej aty në ndërtesën e komunës së Koçanit, komisariatin e policisë dhe në fund në gjykatën themelore dhe prokurorinë.Të afërmit e pranishëm sollën edhe fotografi të të dashurve të tyre që humbën jetën në në tragjedinë e 16 marsit.
Të gjithë të dyshuarit akuzohen për shkaktimin e veprave të rënda kundër sigurisë së përgjithshme për të cilat janë parashikuar dënime me burg nga 3 deri në 20 vjet, ndërsa një person, nga ana tjetër akuzohet për veprën penale të marrjes së ryshfetit.
Bëhet fjalë për të punësuar në Ministrinë e Ekonomisë i cili, në këmbim të parave ka mundësuar që diskoteka të punojë me licencë të falsifikuar.
Ditën e djeshme ndërroi jetë edhe viktima e 60-të e zjarrit, pasi autoritetet shëndetësore njoftuan se Aleksandar Karadakovski, i cili po trajtohej në Lituani, iu nënshtrua plagëve të tij.
Karadakovski ishte menaxher në diskotekën “Puls”, ku njëherësh punonte edhe si banakier, ndërsa pikërisht ai ishte një nga 34 personat e përfshirë në hetimin për shkaqet e zjarrit.
