Presidentja Gordana Siljanovska Davkova e karakterizoi sot deklaratën e liderit të BDI-së, Ali Ahmeti, se nëse ish-ministri i Ekonomisë Kreshnik Bekteshi akuzohet për tragjedinë e Koçanit, ai do të dalë në rrugë dhe nuk do të kthehet derisa të provokojë zgjedhje të parakohshme parlamentare dhe lokale, si presion mbi gjyqësorin.Kreu i shtetit, duke iu përgjigjur pyetjes së një gazetari për të komentuar deklaratën e fundit të Ahmetit, theksoi se ndryshe nga ai, ajo i mat fjalët sepse nuk dëshiron të ndërhyjë në pushtetin gjyqësor.-Ndryshe nga zoti Ahmeti, unë do t’i mat fjalët e mia, nuk dua të ndërhyj në gjyqësor, por ju e dini që të gjithë, përfshirë zotin Ahmeti dhe BDI-në, kanë kërkuar vazhdimisht pavarësinë e gjyqësorit, por një fjalim i tillë në fakt do të thotë presion mbi gjyqësorin. Nuk dua të jap një vlerësim për kualifikimin, ndoshta është një moment dobësie ose nuk dua të them një moment mossinqeriteti, por 30 vjet më vonë, dhe veçanërisht BDI 20 vjet më vonë në pushtet, duhet të respektojmë parimin e ndarjes së pushteteve dhe partitë duhet të qëndrojnë mënjanë. E kam thënë shumë herë se shpesh thonë për ne se nuk mund të dallojmë vijën e hollë ku mbarojnë partitë dhe ku fillojnë institucionet shtetërore. Vendet në të cilat partitë ndonjëherë e paraqesin veten sikur të ishin institucione shtetërore, kur nuk janë, quhen partitokraci, e cila nuk është një model demokratik. Z. Ahmeti ka kërkuar shumë herë verifikim, verifikimi është në funksion të kryerjes cilësore të funksioneve, përfshirë edhe Gjykatën. Shpresoj që kjo të ketë qenë vetëm një deklaratë dhe që zoti Ahmeti dhe BDI, të cilët kanë qenë në pushtet për shumë vite, dy dekada, të kenë mësuar se institucionet duhet të respektohen dhe se Gjykata është ajo që do të gjykojë nëse dikush ka gabim apo jo, nuk po flasim për një person këtu, por prezumimi i pafajësisë vlen për të gjithë, theksoi Siljanovska Davkova pas përfundimit të Akademisë Ceremoniale me rastin e 80 vjetorit të kodifikimit të gjuhës standarde maqedonase, në MANU, ku ajo ishte patron.
© Telegrami.mk