SHBA-të janë në bisedime dialogu me grupin palestinez Hamas. Lajmi u konfirmua për mediat këtë të mërkurë nga zëdhënësja e Shtëpisë së Bardhë Karoline Leavitt e cila tha se administrata e presidentit Donald Trump është në dialog të drejtpërdrejtë me grupin palestinez Hamas, dhe se këto diskutime janë në interesin e SHBA-së.Leavitt tha gjithashtu se Izraeli është konsultuar “për këtë çështje” dhe bisedimet janë “në vazhdim”.
Leavitt nuk pranoi të specifikojë qëllimin e diskutimeve, duke përfshirë nëse ato kanë të bëjnë vetëm me lirimin e pengjeve të tjera të mbajtur nga Hamasi, ose nëse adresojnë propozimin e gjerë të Trumpit për të marrë pronësinë e Rripit të Gazës.
“Dialogu dhe biseda me njerëzit anembanë botës për interesin më të mirë të popullit amerikan është diçka që presidenti e ka dëshmuar, është ajo që ai beson se është një përpjekje me mirëbesim për të bërë atë që është e drejtë për popullin amerikan”, u tha ajo gazetarëve në Shtëpinë e Bardhë.
Faqja e lajmeve Axios më herët të mërkurën zbuloi ekzistencën e negociatave sekrete, të cilat janë zhvilluar në kryeqytetin e Katarit javët e fundit.
Axios identifikoi të dërguarin presidencial të SHBA-së për çështjet e pengjeve Adam Boehler si kryesues të delegacionit amerikan, një fakt i pranuar nga Leavitt.
Një marrëveshje e përkohshme armëpushimi dhe shkëmbimi i të burgosurve, e cila filloi më 19 janar, ndaloi për pak kohë dhunën, por skadoi fundjavën e kaluar.
Kryeministri izraelit Benjamin Netanyahu ka refuzuar të negociojë fazën e dytë të marrëveshjes trefazore dhe në vend të kësaj kërkon të zgjasë fazën e parë. Hamasi, megjithatë, insiston në negociatat për fazën e dytë, duke përfshirë një tërheqje të plotë të Izraelit dhe një fund të plotë të luftës.
