Një nga ministret më të rëndësishme të kabinetit britanik, Suella Braverman, u shkarkua këtë të hënë nga kryeministri Rishi Sunak, pak ditë pasi shkroi një artikull nxitës në gazeta ku akuzonte policinë për njëanshmëri.
Kritikët kishin argumentuar se Braverman, e cila si ministre e Brendshme ishte përgjegjëse për zbatimin e ligjit, imigracionin dhe sigurinë kombëtare, kishte nxitur tensione përpara një demonstrate të madhe pro-palestineze në Londër të shtunën, gjatë së cilës policia u përlesh me kundërprotestuesit e ekstremit të djathtë.
Megjithëse largimi i Braverman nga puna dukej i mundshëm që kur artikulli i saj u botua javën e kaluar, Sunak duket se e ka vonuar bërjen e këtij ndryshimi për disa ditë, në mënyrë që të kryejë një riorganizim të shumëpritur dhe më të gjerë të kabinetit të tij.
Largimi i saj vjen pas publikimit të një artikulli në The Times të Londrës, në të cilin Braverman qortonte forcat kryesore të policisë së qytetit për të mos ndaluar një protestë pro-palestineze.
Ajo i përshkroi dhjetëra mijëra njerëz që kanë marrë pjesë në protestat e rregullta të së shtunës në Londër në mbështetje të palestinezëve si “marshues të urrejtjes” dhe “kriminelë”, pavarësisht faktit se demonstratat kanë qenë kryesisht paqësore.
Në artikullin e saj, Braverman pohoi se demonstratat nuk ishin “thjesht një thirrje për ndihmë për Gazën”, por “një pohim i përparësisë nga grupe të caktuara veçanërisht islamikët, të llojit që jemi mësuar të shohim më shumë në Irlandën e Veriut”.
Kjo referencë për Irlandën e Veriut, duke përdorur retorikisht tensionet sektare në një rajon ku përpjekjet për të rivendosur një qeveri të ndarjes së pushtetit deri më tani kanë dështuar, gjithashtu provokoi zemërim.
Në artikull, Braverman akuzoi policinë për një “standard të dyfishtë” në mënyrën se si i trajtonte protestat.
