Situata në plazhin e Bunecit është normalizuar pas shembjes që pësoi një pjesë e murit të ujëmbledhësit të hidrocentralit në fshatin kodrinor Sasaj në bashkinë Himarë. Nga Lukova e afërt u njoftua orë më vonë se përmbytja e nënstacionit u bë shkak që zona të mbetej pa energji elektrike.
Ngjarja krijoi panik dhe rrezik për përmbytje mesditën e së enjtes, teksa rezervuari i furnizuar me gati 15.000 m3 ujë e zbrazi sasinë nëpër rrugët drejt detit dhe zhyti në baltë të paktën 12 biznese të Bunecit.
Autoritetet njoftuan se ngjarja ndodhi rreth orës 12:26 dhe si rrjedhim i vërshimit të ujit segmenti rrugor nga Buneci drejt Lukovës u bë fillimisht i kalueshëm vetëm nga automjetet e rënda.Nuk pati probleme në njerëz nga fundosja e pjesës kufizuese të ujëmbledhësit, një ndërtim ky i vitit 2010.
“Aktualisht aksi i rrugës nacionale Bunec–Piqeras është bërë i kalueshëm dhe po punohet nga strukturat e bashkisë Himarë për pastrimin e baltës. Situata po ndiqet nga prefektura Vlorë dhe strukturat e Emergjencave Civile,” njoftoi Ministria e Mbrojtjes.
Policia u bëri thirrje qytetarëve që të shmangin lëvizjet në zonën e rrezikuar dhe të raportojnë menjëherë për çdo rast emergjence.
/rtsh.al/
