Shtetet e Bashkuara nuk i kanë bërë asnjë “lëshim” Rusisë, theksoi Sekretari amerikan i Shtetit, Marco Rubio, duke iu përgjigjur kritikave ndaj administratës Trump në lidhje me politikën e saj ndaj luftës në Ukrainë.Senatorja demokrate Jeanne Shaheen tha se presidenti rus po kërkon të “blejë kohë” në mungesë të presionit amerikan apo sanksioneve të reja, të tilla si ato të miratuara sot nga Bashkimi Evropian.
Nga ana e tij, kreu i diplomacisë amerikane vuri në dukje se Trump nuk dëshiron të vendosë sanksione të reja ndaj Rusisë sepse “ai beson se tani, nëse fillon të kërcënojë me sanksione, rusët do të ndalojnë bisedimet dhe është e dobishme të jesh në gjendje të flasësh me ta dhe t’i bësh presion që të ulen në tryezën e negociatave”.Në të njëjtën kohë, ai hodhi poshtë çdo ide se Uashingtoni nuk po e ndihmon më Ukrainën, duke thënë se ukrainasit në thelb po kërkojnë “sisteme të mbrojtjes ajrore, njësi Patriot, të cilat, sinqerisht, ne nuk i kemi, por po punojmë ngushtë me aleatët tanë të NATO-s” për t’i siguruar ato.
BE-ja miratoi sot paketën e 17-të të sanksioneve kundër Rusisë, duke synuar anijet cisternë fantazmë në flotën e errët të Rusisë, të cilat ndihmojnë Moskën të anashkalojë sanksionet mbi eksportet e naftës ruse. Dhe Britania njoftoi sot sanksione të gjera që synojnë sektorët ushtarakë, të energjisë dhe financiarë të Rusisë, duke rritur presionin ndaj Moskës për shkak të luftës në Ukrainë.
