Përfshirja e bullgarëve në Kushtetutën e Maqedonisë së Veriut është vetëm një kusht paraprak për fillimin e negociatave për anëtarësim të vendit në BE dhe me këtë nuk shterren kushtet që duhet ti plotësoj ky vend.
Këtë e ka theksuar presidenti i Bullgarisë, Rumen Radev përmes një letre drejtuar liderëve dhe institucioneve evropiane, përmes së cilës apelon që pranimi i vendit në BE të bëhet në bazë të përmbushjes së kritereve për anëtarësim, e jo në bazë të politikave lobuese.
Radev thekson se gjithmonë e ka shprehur dhe mbrojtur qëndrimin parimor të Bullgarisë për mbështetjen e vazhdueshme të integrimeve evropiane të Maqedonisë.
“Në të njëjtën kohë, shteti bullgar gjithmonë ka theksuar parimet kryesore mbi të cilat bazohet procesi i zgjerimit të BE-së, ato të meritave të veta dhe përmbushjes së kritereve të anëtarësimit përmes reformave gjithëpërfshirëse socio-politike. Prandaj, duke pasur parasysh barrën komplekse historike të rajonit tonë, në këtë proces ka një fokus të veçantë në çështjen e respektimit të parimeve të fqinjësisë së mirë dhe të drejtave të njeriut”, thuhet në letër.
Sipas tij, në dy protokollet e nënshkruara deri më tani, janë vendosur angazhime të rëndësishme specifike, si refuzimi i Maqedonisë së Veriut për të përdorur gjuhën e urrejtjes ndaj Bullgarisë, ndryshimi i përmbajtjes së teksteve shkollore në sistemin e arsimit të përgjithshëm, përfundimi i diskriminimit ndaj qytetarëve që identifikohen si bullgarë, duke deklasifikuar arkivat e shërbimeve sekrete jugosllave në lidhje me masakrat kundër popullatës bullgare në Maqedoninë e Veriut.
“Fatkeqësisht, deri më tani nuk është bërë asgjë nga Shkupi për këto çështje”, kujton kushtet Radev.
