www.telegrami.mk
lajmi interaktiv
Në Ditën Botërore të Ujit, kur qytetarëve u serviren fjalë të mëdha për “mbrojtje”, “përgjegjësi” dhe “standarde evropiane”, një pyetje thelbësore mbetet në ajër: pse mungon zëri i Bilall Kasami, njeriu që po shtyn me ngulm dhënien e ujit përmes modelit PPP?
Deklaratat institucionale tingëllojnë bukur në letër: investime, reforma, partnerë ndërkombëtarë. Por realiteti është më i ashpër – kur flitet për “pasuri të përbashkët”, nuk mund të shmanget debati për përfshirjen e sektorit privat në një nga burimet më jetike. Kjo nuk është çështje teknike, është çështje politike, ekonomike dhe mbi të gjitha publike.
Mungesa e Kasamit në një ditë simbolike si kjo nuk është rastësi – është shmangie. Sepse përballja me pyetjen kryesore do të ishte e pashmangshme: a po mbrohet uji si e drejtë publike, apo po hapet rruga për menaxhim që nesër mund t’i kushtojë më shtrenjtë qytetarëve?
Qeveria flet për transparencë dhe standarde evropiane, por standardet evropiane nisin me debat të hapur dhe përfshirje të të gjitha palëve – jo me deklarata të njëanshme dhe mungesë të aktorëve kyç. Nëse vërtet synohet një sistem i qëndrueshëm, atëherë qytetarët meritojnë përgjigje të drejtpërdrejta, jo slogane të ricikluara.
Në fund, dilema mbetet e qartë:
A është uji “pasuri e përbashkët” vetëm në fjalime festive, apo edhe në vendimet reale që po merren pas skenës?…www.telegrami.mk
==========================================================
lajmi aktiv që qarkullon
