Mësimdhënësit, nxënësit, prindërit dhe palët e interesuara do të mund të japin propozime dhe vërejtje në lidhje me draft-konceptin për reforma në arsimin e mesëm në Maqedoninë e Veriut.
“U hartua draft Koncepti për reformat në arsimin e mesëm gjimnaz dhe ftojnë të gjithë mësimdhënësit, nxënësit, prindërit, ekspertët dhe palët e interesuara me mendimet, propozimet dhe vërejtjet e tyre të përfshihen në diskutim publik për të miratuar versionin më të mirë”, raportoi Ministria për Arsim dhe Shkencë.
Ministria vlerësoi se përmes këtij Koncepti të publikuar në ueb faqen zyrtare të Byrosë së Zhvillimit të Arsimit, synohet një arsim më bashkëkohor.
Qytetarët deri më 31 janar do të mund të dërgojnë vërejtjen dhe propozimet në adresën [email protected].
“Dokumenti i propozuar ofron qasje bashkëkohore që synojnë përvetësimin e shkathtësive praktike, zhvillimin e të menduarit kritik, integrimin e teknologjive digjitale dhe harmonizimin me standardet ndërkombëtare arsimore, si dhe zgjedhjen më të madhe për nxënësit me qëllim që ata vetë të munden të modelojnë rrugën e tyre arsimore sipas interesave dhe synimeve të tyre në të ardhmen”, deklarua nga Ministria.
