Aktivistja e njohur e shoqërisë civile dhe themeluese e bibliotekës së parë shqipe në Manastir, Emira Selimi, ka reaguar ashpër pas ngjarjes së rëndë që ndodhi në qendër të qytetit, ku një i ri shqiptar me shtetësi suedeze u sulmua nga disa persona vetëm pse mbante një bluzë me simbolin e shqiponjës.
Në një reagim publik të shpërndarë në rrjetet sociale, Selimi ka denoncuar standartet e dyfishta të institucioneve dhe heshtjen e autoriteteve përballë dhunës me motiv etnik.
“Po të ishin shqiptarë, deri tani do të ishin në paraburgim. Por jo, kur ndodh nga këta të tjerët, quhet ‘heroizëm’. Qeveri shoviniste, turp ju qoftë!” – shkruan Selimi.
Ajo thekson se sulmuesit jo vetëm që kërcënuan dhe sulmuan fizikisht të riun shqiptar, por edhe ia hoqën bluzën me dhunë dhe e dogjën në mes të qytetit, në një akt të pastër të urrejtjes etnike dhe provokimit publik.
“Këta janë djemtë që kërcënuan një shqiptar në qendër të Manastirit. Kjo nuk është vetëm dhunë fizike, por edhe një sulm i drejtpërdrejtë mbi identitetin tonë kombëtar,” – theksoi ajo.
Selimi, e cila prej vitesh angazhohet në ruajtjen e kulturës dhe të drejtave të shqiptarëve në Manastir, paralajmëroi se normalizimi i urrejtjes dhe mungesa e ndëshkimit institucional për raste të tilla po krijojnë një klimë të rrezikshme për bashkëjetesën dhe barazinë qytetare.
