Prokuroria Publike ka dorëzuar propozim për masa paraprake për kryetaren e Komisionit Shtetëror për Parandalimin e Korrupsionit (KSHPK), Tatjana Dimitrovska, në kuadër të rastit “Aditiv”.
Siç kanë njoftuar nga Gjykata Themelore Penale në Shkup, Dimitrovska aktualisht është në gjykatë dhe do të paraqitet para gjykatësit për procedurë paraprake. Nga aty bëjnë të ditur informacione shtesë për zgjidhjen e propozimit.
Prokuroria për Ndjekjen e Krimit të Organizuar dhe Korrupsionit thotë se në kuadër të çështjes “Aditiv”, në bazë të provave të mbledhura, është lëshuar Urdhri për kryerjen e hetimeve edhe për tre persona të tjerë. Ata nuk specifikuan emra.
Rasti “Aditiv” ka të bëjë me hetimin për keqpërdorimin e prokurimit publik dhe pastrimin e parave në lidhje me prokurimin e aditivëve të thëngjillit për nevojat e SHA ESM – Rek Manastir dhe REK Oslomej. Janë akuzuar 31 persona fizikë dhe 5 persona juridikë.
Sipas prokurorisë, të dyshuarit kanë organizuar dhe kryer riregjistrimin e personave juridikë për të anashkaluar procedurat e prokurimit publik, duke u mundësuar kompanive të caktuara të fitojnë kontrata dhe të përfitojnë përfitime të konsiderueshme financiare.
