Pas ngjarjeve dramatike të mërkurën në mbrëmje, situata në Sarajevën Lindore është më e qetë mëngjesin e së enjtes, por forca të shumta policore mbeten të pranishme rreth ndërtesës së Qeverisë së Republikës Srpska (RS). Anëtarët e Ministrisë së Punëve të Brendshme të RS-së vazhdojnë të bllokojnë rrugët anësore dhe nuk lejojnë mediat të afrohen pranë objektit, shkruan “Klix”.
Mendohet se presidenti i entitetit, Milorad Dodik, dhe bashkëpunëtorët e tij kanë kaluar natën në ndërtesë dhe pritet që aktivitetet e tyre të vazhdojnë sot nga aty.
Mbrëmë tre inspektorë të Agjencisë Shtetërore për Hetime dhe Mbrojtje (SIPA) u përpoqën t’i dorëzojnë urdhërarrestin Dodikut, por u ndaluan nga forcat e armatosura të MPB-së së RS-së, të cilët kërcënuan me përdorim force.
SIPA njoftoi se ky veprim përbën vepër penale të “rebelimit të armatosur”, pasi u pengua ekzekutimi i një urdhri të lëshuar nga Gjykata e Bosnjë dhe Hercegovinës. Urdhri përfshin jo vetëm Dodikun, por edhe kryeministrin e RS-së, Radovan Vishkoviq, dhe kryetarin e Asamblesë Kombëtare të RS, Nenad Stevandiq.
Në një konferencë për shtyp, Dodiku e cilësoi përpjekjen për arrestim si “sulm të organizuar nga institucionet shtetërore” dhe ka thënë se “nuk do të dorëzohet nën presion”. Ai shtoi se ndihet i sigurt nën mbrojtjen e policisë së entitetit serb, përfshirë Njësinë Speciale Anti-Terroriste.
Ngjarjet e fundit ngrenë shqetësime serioze për funksionimin e institucioneve shtetërore dhe respektimin e rendit juridik në Bosnjë dhe Hercegovinë, duke theksuar tensionet e vazhdueshme mes niveleve shtetërore dhe atyre entitetare.
