Në Maqedoni, ushqimi përfaqëson shpenzimin më të madh në buxhetin familjar, duke zënë mbi një të tretën (rreth 38-50 për qind) të konsumit total. Sipas sondazheve, shpenzimet shpesh i tejkalojnë të ardhurat dhe, së bashku me ushqimin, shpenzimet më të mëdha janë për strehim dhe energji. Kjo pjesëmarrje është dukshëm më e lartë se në vendet e zhvilluara evropiane.
Statistikat dhe përllogaritjet e ndryshme në Maqedoni konfirmojnë se shpenzimet për ushqim dhe pije zënë pjesën më të madhe të buxhetit mujor të një familjeje. Me fjalë tjera, pjesa më e madhe e buxhetit mujor të familjeve në vend shkon për ushqim, gjë që tregon një standard të ulët jetese. Edhe në shtetet e rajonit, kostoja e ushqimit është disa herë më e lartë në dallim prej harxhimeve në shtetet evropiane. Sa për krahasim, familjet në SHBA ndajnë 7 për qind të konsumit të tyre për shpenzimet e ushqimit, në Mbretërinë e Bashkuar 11.3 dhe në Gjermani rreth 11 për qind.
Ndërsa çmimet e karburanteve rriten, rritet edhe frika nga një spirale çmimesh që mund të rrisë çmimet e produkteve bazë. Në kushtet e pasigurisë globale në rritje, të shkaktuar nga lufta në Lindjen e Mesme, qytetarët kanë frikë se si kjo do të ndikojë në standardin e tyre të jetesës në vend, në rast se pasoja e parë janë tronditjet e mundshme të çmimeve.
Familjet në Maqedoninë e Veriut shpenzuan mbi gjysmën e buxhetit të tyre, ose 50.8 për qind, për ushqim dhe pije, sipas të dhënave nga Libri Vjetor Statistikor 2025 i Entit Shtetëror të Statistikave. Një familje mesatare çdo vit ndante rreth 159.750 denarë për këto nevoja, ku pjesën më të madhe të parave e ndanin për mish, produkte qumështi dhe produkte drithërash.
Nga ana tjetër të dhënat më të reja tregojnë se një familjeje me katër anëtarë i nevojiteshin 67.818 denarë në mars të këtij viti, për të përmbushur nevojat themelore, sipas të dhënave nga shporta minimale sindikale, të përgatitura nga Lidhja e Sindikatave të Maqedonisë.
Sipas LSM-së, me një apartament me qira prej 60 metrash katrorë, shpenzimet themelore për një familje me katër anëtarë për muajin mars janë 83.193 denarë. Të dhënat më tej tregojnë se ushqimi kushton 25 mijë denarë apo afër 38 për qind e shportës konsumatore.
Edhe në shtetet e rajonit , kostoja e ushqimit është disa herë më e lartë në dallim prej harxhimeve në shtetet evropiane.
Midis vendeve fqinje, vetëm Mali i Zi ka një pjesë më të lartë të kostove të ushqimit sesa Serbia ku shpenzohet 42.5 për qind e pagës mesatare vetëm për ushqim .
Në shpenzimet e familjeve sllovene, transporti, komunikimi dhe strehimi luajnë një rol më dominues sesa ushqimi. Në Kroaci, familjet shpenzojnë pak më shumë se një të katërtën e pagës mesatare për ushqim. Në Kroaci, punonjësit u paguan mesatarisht 1.446 euro, një familje me tre anëtarë shpenzon 389 euro në muaj për ushqim.
Në rajon, pjesa më e madhe e pagës mesatare ndahet për ushqim, sipas llogaritjeve të sindikatave lokale, ku vetëm familjet në Mal të Zi harxhojnë rreth gjysma e pagës. Paga mesatare malazeze në gusht ishte 1,015 euro dhe një familje me katër anëtarë shpenzon 645 euro vetëm për ushqim. Nëse llogariten përafërsisht për një familje me tre persona, shpenzimet për ushqim janë rreth 480 euro, ose 47.7 për qind e pagës. /Koha/
