Presidenti Stevo Pendarovski sot bisedoi në telefon me Derek Shole, këshilltar i sekretarit shtetëror të SHBA-së, Antoni Blinken.
Pendarovski në Fejsbuk kumtoi se me këshilltarin Shole kanë biseduar për proceset eurointegruese të vendit, për luftën lundër krimit të organizuar dhe korrupsionit, si dhe për situatën në rajon.
Këshilltari i sekretarit shtetëror të SHBA-së, Derek Shole, duhej sot, siç ishte paralajmëruar fillimisht nga Departamenti i Shtetit, të vijë në Shkup, por për shkak të testit pozitiv për Kovid-19, e shtyu vizitën pas Vitit të Ri.
Shole në vend duhej të bisedojë me përfaqësues qeveritarë për një sërë çështjesh, përfshirë edhe për energjetikën, ekonominë dhe luftën kundër korrupsionit, kumtoi Departamenti i Shtetit.
Përveç Maqedonisë së Veriut, në programin e Sholes ishin edhe vizitat në Kosovë, Serbi, Bosnjë e Hercegovinë, Mal të Zi, Kroaci dhe Belgjikë. Qëllimi i vizitave, siç informuan nga Departamenti i Shtetit, është të ceket përkushtimi i përhershëm i SHBA-së për paqen, stabilitetin dhe prosperitetin në rajon.
