Dega e Tetovës e Partisë Demokratike Shqiptare ka njoftuar zyrtarisht se më 13 dhjetor, ditën e shtunë, në ora 11:30, në sallën e sportit të Sh.F. “Liria” në Tetovë, do të mbahet Kuvendi Zgjedhor i Degës.
Sipas njoftimit, gjatë muajve të fundit Dega ka zhvilluar një proces të thellë konsolidimi të brendshëm, duke përfshirë hapjen ndaj prurjeve të reja, verifikimin e anëtarësisë aktuale dhe rritjen e transparencës së brendshme.
“Ky proces ka krijuar bazën e nevojshme për zhvillimin e një kuvendi të rregullt, përfaqësues dhe plotësisht në përputhje me statutin e Partisë Demokratike Shqiptare,” tha për TetovaSot Fatmire Isaki, anëtare e këshillit koordinues për riorganizim.
Në Kuvendin e 13 dhjetorit pritet të zgjidhen organet e reja drejtuese: Kryetari i Degës dhe Kryesia e Degës, të cilat do të kenë misionin të udhëheqin strukturën me efikasitet dhe vizion politik.
Nga PDSH-Tetovë theksojnë se procesi i reformimit nuk përfundon me këtë kuvend, por do të vazhdojë përmes:
intensifikimit të komunikimit me qytetarët,
rritjes së përfshirjes së grave dhe të rinjve,
forcimit të kapaciteteve organizative,
hapjes ndaj anëtarëve të rinj.
Gjithashtu, sipas Isakit, riorganizimi është pjesë e një procesi më të gjerë që do të shtrihet edhe në degët e tjera të PDSH-së, me synim forcimin e funksionimit dhe rritjen e efikasitetit në mbarë strukturën e partisë.
