Edhe kryeministri edhe unë jemi mësimdhënës dhe i dimë saktësisht sfidat, tha ministrja e Arsimit, Vesna Janevska, e pyetur për rritjen e pagave në arsim. Ajo shtoi se buxheti vjetor që kanë trashëguar në ministrinë e arsimit është shpenzuar në gjysmën e parë të vitit.
“Le ta kalojmë këtë vit me vullnetin dhe dëshirën e tyre, për të kontribuar në dijen e studentëve, për të kontribuar në përparimin e vendit ndërsa ajo që u takon atyre, sepse unë dhe kryeministri e dimë mirë se çfarë do të marrin, në atë moment kur shteti do të mund ta bëjë këtë, dhe unë si ministër do të luftoj edhe në nivel të qeverisë edhe me ata duke negociuar, që të jetë sa më mirë”, tha Vesna Janevska, ministre e Arsimit.
Me afrimin e vitit të ri shkollor, prindërit përgatiten intensivisht për detyrat shkollore të fëmijëve. Ministria e Arsimit tashmë ka filluar shpërndarjen e teksteve të miratuara dhe të shtypura, si dhe të materialeve mësimore nëpër shkolla. Ministrja Janevska tha se do të ketë tekste për të gjitha lëndët përveç gjuhëve të huaja. Ajo gjithashtu konfirmoi se tekstet e historisë dhe shoqërisë për klasat e 5-ta dhe të 6-ta, si dhe tekstet e historisë dhe gjeografisë për klasën e 7-të, do të jenë në dispozicion me kohë.
“Këtë vit ata do të arrijnë deri në fillimin e vitit shkollor. Shpërndarja tashmë ka filluar, kemi njoftuar se ka filluar. Ende shtypen tekste shkollore. Shpresoj thellësisht që kjo të respektohet nga distributorët, e përsëris që nuk do të ketë tekste për gjuhë të huaja, jo për fajin e kësaj qeverie por për fajin e qeverisë së kaluar sepse tenderi është anuluar dhe është ende në procedurë ankese dhe asgjë që do të jetë në përputhje me ligjin nuk mund të bëhet përtej kësaj, ndërkohë ne presim që ajo procedurë të përfundojë”, tha Janevska.
Nga MASH alarmojnë që drejtorët të jenë të gatshëm për tekstet shkollore, sepse distributorët nuk do të vijnë për herë të dytë apo të tretë.
“Është përgjegjësia juaj që të merrni tekstet shkollore në kohën e caktuar nga distributori. Jam e sigurt se secili prej jush ka personel të mjaftueshëm në dispozicion dhe mund ta kryeni me sukses angazhimin. Pres që të gjithë të jenë në lartësinë e detyrës, në mënyrë që të përgatiten mirë për të pritur fillimin e vitit të ri shkollor”, deklaroi ajo.
Në libraritë në të gjithë vendin tashmë ka një aktivitet të shtuar, ku prindërit informohen për çmimet e materialeve të nevojshme. Vlerësohet se shpenzimet për vitin e ri shkollor do të jenë nga 3.000 deri në 5.000 denarë për nxënës.
Edhe pse disa prindër i konsiderojnë këto kosto si një barrë të konsiderueshme financiare, disa të tjerë thonë se çmimet janë të arsyeshme dhe brenda pritjeve. Për momentin shumica e prindërve ende pyesin vetëm për çmimet. Blerja serioze e teksteve dhe materialeve të tjera do të fillojë pasi prindërit të marrin listat e nevojshme nga shkollat./TV21
