Numri i nxënësve në shkollat fillore dhe të mesme në Shqipëri po ulet, mesatarisht për 10 mijë nxënës çdo vit.
“Të dhënat nga Instituti i Statistikave (INSTAT) tregojnë se në vitin 2015 kishte 362 mijë nxënës në arsimin parauniversitar, ndërsa në vitin shkollor 2024-2025 kishte 250 mijë. Gjithsej 112 mijë nxënës më pak në arsimin parauniversitar, në afat prej një dekade, që është ulje prej 31 për qind”, publikuan mediat.
Rënia është edhe më e madhe kur flitet për arsimin nëntëvjeçar, me 125 mijë fëmijë më pak në shkollë midis viteve 2014 dhe 2024. Vetëm në pesë vitet e fundit, arsimi shqiptar ka humbur mbi 61 mijë nxënës.
Arsyet kryesore për këto numra janë të lidhura me uljen e shkallës së natalitetit dhe emigrimin masiv.
Pasoja e kësaj krize është mbyllja e shkollave: nga viti 2012 deri në vitin 2022, u mbyllën 295 shkolla nëntëvjeçare, duke përfaqësuar mbi 22 për qind të numrit total.
Edhe numri i nxënësve të cilët për herë të parë ulen në bankat shkolle, gjithashtu, po ulet. Para një dekade, rreth 35.000-38.000 nxënës janë regjistruar në klasën e parë. Në këtë vit të ri shkollor, kishte 26.500 nxënës.
