Procedurat institucionale dhe administrative assesi të mbarojnë për çerdhen e re në fshatin Përshefcë të Komunës së Tearcës, e cila është ndërtuar para tre viteve por që ende nuk ka filluar të funksionojë, shkruan Portalb.mk.
Ky objekt duhej të ishte gati që në vitin 2023 mirëpo zvarritja e procedurave nga ana e autoriteteve ka bërë që kjo çerdhe ende të jetë e mbyllur për fëmijët.
Periudhën e fundit ka pasur intensifikim të aktiviteteve, megjithatë ende kanë mbetur procedura të cilat duhet të përfundojnë.
Ministria e Administratës Publike para pak ditëve dha pëlqimet që u zvarritën me muaj.
“Më 20 nëntor 2025, Ministria e Administratës Publike ka miratuar Rregulloren për Organizimin e Brendshëm dhe Rregulloren për Sistematizimin e Vendeve të Punës për Çerdhen “Folea” – Tearcë”, thanë nga Ministria e Administratës.
Nga Ministria e Politikës Sociale sqarojnë për Portalb.mk thonë se pas marrjes së miratimit të Rregullores për Organizimin e Brendshëm dhe Rregullores për Sistematizimin e Vendeve të Punës të çerdhes “Folea” – Tearcë nga Ministria e Administratës Publike, këto akte tashmë kanë hyrë në fuqi.
Ministria e Politikës Sociale, Demografisë dhe Rinisë gjithashtu ka dhënë miratimin për Planin Vjetor të Punësimit dhe ka dërguar kërkesë për miratim financiar për punësime.
“Pas marrjes së njoftimit nga Ministria e Financave për fondet e parashikuara në buxhet, çerdhja do të jetë në gjendje të fillojë procedurën e punësimit, thanë nga Ministria e Politikës Sociale.
Megjithatë nga Ministria e Financave nuk tregojnë se kur konkretisht do të japin pëlqim për të njëjtat.
“Ministria e Financave u përgjigjet kërkesave të paraqitura nga përdoruesit e buxhetit brenda afatit të përcaktuar me ligj në përputhje me Ligjin për Buxhetet”, thanë nga Ministria e Financave.
Kryetari i Komunës së Tearcës, Daut Memishi gjatë fushatës zgjedhore premtoi se çerdhja do të hapet në ditët e para pasi ai të vijë në krye të komunës.
“Në muajt e parë garantoj se kjo çerdhe do të nisë me funksionimin e punës sepse ka pasur disa probleme teknike me sa jam i informuar, gjithë fëmijët tanë do të jenë ata të cilët do ta gëzojnë këtë çerdhe në Komunën e Tearcës në ditët e para të qeverisjes tonë”, tha Memishi më 27 shtator 2025.
Megjithatë, nga Komuna e Tearcës me të cilën që nga 3 nëntori udhëheq Memishi nuk u përgjigjën në pyetjet gazetareske për këtë çështje.
Pavarësisht premtimeve dhe afateve kohore edhe nga administrata e kaluar komunale, çerdhja vazhdon të jetë e mbyllur.
Ndërtimi i çerdhes në fshatin Përshefcë të Komunës së Tearcës filloi në fillim të vitit 2022, ndërsa objekti përfundoi në janar 2023. Ky objekt duhej të ishte gati që në prill 2023, por kjo nuk ndodhi. Faji për këtë vonesë sipas autoriteteve komunale aso kohe mbeti te rrjeti i ujësjellësit.
Objekti i çerdhes ka sipërfaqe prej 1400 metra katrorë në parcelë të përgjithshme prej 6935 metra katrorë, dhe ka kapacitet për 155 fëmijë nga mosha 0 deri në 6 vjeç.
Ndërtimi i kësaj çerdheje është e bashkëfinancuar nga Bashkimi Evropian nëpërmjet Instrumentit të Asistencës së Para-Aderimit (IPA 2). Vlera e këtij projekti është rreth 980 mijë euro.
Investitorë në këtë projekt janë IPA- 2 Programi, Ministria e Financave- Departamenti (CFCD) dhe Ministria për Punë dhe Politikë Sociale.
Realizues të punëve ndërtimore ishin AK-Invest-Tetovë, ndërsa mbikëqyrës të punëve ndërtimore ishin EuroConsult LTD-Shkup.
