Myftinia e Tetovës shpërndan mbi 1,000 dhurata për fëmijët në prag të festës së Bajramit
TETOVË, Mars 2026 – Sektori Humanitar pranë Myftinisë së Tetovës, në prag të festës së madhe të Bajramit, ka realizuar me sukses projektin tradicional “Pako me dhurata – Urime Bajrami 2026”.
Ky aktivitet, i cili tashmë është kthyer në një traditë të bukur solidariteti, synon të sjellë gëzim dhe atmosferë festive te nxënësit e shkollave fillore dhe fëmijët në zona të ndryshme të rajonit të Tetovës. Përmes këtyre dhuratave simbolike, Myftinia synon të forcojë ndjenjën e kujdesit social dhe t’u urojë festën më të vegjëlve në mënyrën më të ngrohtë.
Gjatë realizimit të këtij projekti, janë vizituar institucione edukative në gjashtë komuna, duke përfshirë një numër të madh përfituesish:
Komuna e Tetovës: Gjithsej 489 fëmijë në shkollat “Migjeni”, “Liria”, “Naim Frashëri” dhe “Rexhep Voka” (Shipkovicë).
Komuna e Zhelinës: 152 fëmijë në fshatrat Pallaticë dhe Zhelinë.
Komuna e Bogovinës: 111 fëmijë në shkollën “Sabedin Bajrami” në Kamjan.
Komuna e Bërvenicës: 99 fëmijë në fshatrat Çellopek dhe Meletinë.
Komuna e Tearcës: 97 fëmijë në fshatrat Dobrosht, Nerashtë dhe Sllatinë.
Komuna e Jegunovcës: 67 fëmijë në Jazhincë dhe Orashë.
Bilanci i solidaritetit
Në përfundim të këtij aksioni humanitar, numri total i fëmijëve që pranuan pakot festive arriti në 1,016 përfitues.
Ky projekt nuk është thjesht shpërndarje dhuratash, por një mesazh dashurie dhe vëmendjeje për gjeneratat e reja, duke u siguruar që çdo fëmijë të ndjejë ngrohtësinë e festës së Bajramit.
Realizimi i suksesshëm i këtij aktiviteti dëshmon përkushtimin e vazhdueshëm të Myftinisë së Tetovës në krye me Myftiun Dr. Selver ef. Xhemaili, si dhe bartësi i këtij projekti referenti për humanizëm, Nuhi ef. Ganija, për të qenë pranë qytetarëve, e veçanërisht pranë fëmijëve, duke kultivuar vlerat e larta të solidaritetit dhe humanizmit.
Falemnderojmë donatorët tanë bujarë që kontribuan në realizimin e këtij projekti fisnik:
Kompania KIPPER për 1050 lëngje, 1050 solenka, 1050 pop kekë dhe 1050 çipsa
Kompania EVROPA SHARRI për 19 artikuj me nga 1050 copë
Kompania SHULLAN për 1050 smoki
Allahu ua shtoftë bereqetin
