Zgjedhja e prokurorit publik duhet të bëhet në përputhje me Kushtetutën, e jo në bazë të përkatësisë partiake, thotë për Alsat profesori Mitasin Beqiri, lidhur me nismën e qeverisë për shkarkimin e kryeprokurorit Lupço Kocevski. Beqiri beson se kjo është e mundur, edhe pse praktika e mëparshme tregon se shumica e prokurorëve publikë janë zgjedhur me propozim të partisë në pushtet.
“Çdo qeveri shkon me prokurorët e vet, gjë që është e gabuar. Fillimisht unë jam mbështetës që zgjedhjet të kryhen në mënyrë të ligjshme dhe jo një grup të caktojë prokuror, pastaj grupi tjetër që vjen do ta shkarkojë dhe do të emërojë një prokuror sipas dëshirës së tyre, kjo nuk është e drejtë. A jemi të aftë si shtet, si shoqëri, të përballemi me këtë lloj të keqe? Po, jemi të aftë, por vetëm nëse respektojmë rregulloret ligjore”, deklaroi Mitasin Beqiri, profesor.
Për të arritur pavarësinë në gjyqësor, partitë në pushtet duhet të fillojnë me pastrimin e oborrit të tyre, vlerëson Beqiri.
“Kur ecni me një hap, fillimisht ecni në oborrin tuaj për ta pastruar. Nëse VMRO-ja fillon të merret me të, fillimisht do të merret me kuadrot e veta, jo me kuadrot e ish-qeverisjes. Kur të fillojë VLENI le të mos merret me garniturën e BDI-së por me garniturën e vet, atëherë kur ta pastrojmë fillimisht oborrin tonë, atëherë do të jemi marrë me të keqen, me kriminalitetin”, tha Mitasin Beqiri, profesor.
Qeveria theksoi ndikimin partiak si një nga arsyet për shkarkimin e Kocevskit – duke e akuzuar atë për mosndjekjen e krimeve të pushtetit të kaluar. Që nga pavarësia, në vend ka pasur gjithsej nëntë prokurorë publikë dhe pothuajse secili prej tyre është përcjellë me polemika se kanë vepruar me urdhër të pushtetit ekzekutiv. Edhe pse mënyra e zgjedhjes së prokurorit të shtetit është ndryshuar disa herë, partitë gjithmonë gjejnë modalitete në procesin e përzgjedhjes për të siguruar që kandidati i tyre i dëshiruar të mbetet. Propozimi për shkarkimin e kryeprokurorit Lupço Kocevski, duhet të arrijë nga Ministria e Drejtësisë, e cila do t’ia dorëzojë Qeverisë, e cila do t’ia dorëzojë Këshillit të Prokurorëve Publikë. Fjalën e fundit për shkarkimin e tij do ta kenë deputetët.
