Në një deklaratë pas takimit me përfaqësuesen e lartë të BE-së për Punë të Jashtme dhe Politikë të Sigurisë, znj. Kaja Kallas, udhëheqësit e Maqedonisë së Veriut përcollën një mesazh të qartë dhe të sinqertë: vendi është i përkushtuar ndaj rrugës evropiane dhe pret sinjale konkrete nga Bashkimi Evropian.
“Prania e zonjës Kallas në Shkup është një dëshmi se BE nuk e harron rajonin tonë,” u theksua në deklaratë, duke nënvizuar se bisedimet mes palëve ishin të hapura dhe të sinqerta – ashtu siç u takon partnerëve që synojnë një të ardhme të përbashkët.
Pavarësisht rrugës së vështirë drejt integrimit evropian, përfaqësuesit e Maqedonisë së Veriut shprehën përkushtim të palëkundur: “Ne i përkasim Bashkimit Evropian – jo sepse dikush na e ka borxh, por sepse kemi ndërtuar një shoqëri mbi vlerat demokratike dhe sundimin e ligjit.”
Në deklaratë u kërkua trajtim i drejtë dhe konsistencë nga BE: “Evropa duhet të tregojë lidership, të rikthejë besimin në idenë evropiane, veçanërisht tek të rinjtë.” U theksua se vendi nuk po bën reforma vetëm për duartrokitje, por sepse kjo është rruga e duhur.
Përshëndetës i veçantë iu bë inaugurimit të Dialogut të Parë për Sigurinë dhe Mbrojtjen me BE-në, i cili u cilësua si “një sinjal i fortë se po ecim në të njëjtin drejtim.” Bashkëpunimi në fusha si shëndetësia, mbrojtja dhe politikat rinore u përmend si dëshmi konkrete e afrimit.
Deklarata u mbyll me një mesazh të fuqishëm: “Dora jonë mbetet e shtrirë. Jemi të hapur për bashkëpunim, por qëndrojmë të fortë, me dinjitet. Europa mund të mbështetet tek ne – tani është koha që edhe ne të mbështetemi tek Europa.”
