LSDM thotë se pasi lideri i BDI-së, Ali Ahmeti u vendos në mbrojtje të Artan Grubit, është e qartë se ai është i informuar mirë për vendndodhjen e Grubit dhe ka informacione të rëndësishme për rastin.
“Pse prokuroria dhe Toshkovski nuk e ftojnë Ahmetin të japë deklaratë? Si ka mundësi që edhe Ahmeti edhe Mexhiti e dinë se ku është Grubi nëse Toshkovski është krejtësisht i panjoftuar?
Ky është një shembull klasik i selektivitetit, por edhe një paaftësi e madhe e Toshkovskit dhe MPB-së për zbatimin e ligjit. Artan Grubi duhet të përgjigjet para ligjeve të shtetit, por për shkak të paaftësisë së Toshkovskit apo marrëveshjes së fshehur politike, kjo nuk po ndodh.
Ndërkohë, VMRO-DPMNE-ja po përpiqet dëshpërimisht që për këtë fiasko të fajësojë LSDM-në, por përpjekjet e tilla janë të kota. LSDM-ja nuk e ka fajin që Grubi nuk jep përgjegjësi apo përgjegjës për arratisjen e tij, por fajin e ka vetëm Toshkovski dhe MPB-ja. Ndërkohë, ata po përpiqen të mbulojnë dështimet e tyre në çdo fushë me bomba tymuese dhe mesazhe të reja frikësuese”, njofton LSDM.
