Pas përfundimit të takimit të sotëm në Bruksel pa marrëveshje, kryeministri i Kosovës, Albin Kurti dhe presidenti serb, Aleksandër Vuçiq, do të takohen më 18 mars në Shkup.
Këtë e ka bërë të ditur vetë presidenti serb para mediave, me të përfunduar takimi i tij me Kurtin.
Kjo për shkak se Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, në atë datë gjendet në kryeqytetin e Maqedonisë së Veriut.
“Në datën 18, duhet të shihemi në Maqedoninë e Veriut, kur z. Borrell të vizitojë rajonin. Deri atëherë duhet të flasim me Lajçakun për çështjet për zbatim”, tha Vuçiq para gazetarëve.
Takimin trepalësh në mars, e konfirmoi në konferencë për media edhe Borrell, i cili tha se dy liderët e palëve e kanë pranuar propozimin evropian, i njohur ndryshe si plani franko-gjerman./arbresh.info
